Puntra Pa Bo Sa
Esun cu ta puntra, no ta dualu! Hasiendo pregunta bo por conose lokual ta scondi pa bo ainda, of compronde lokual ta parse straño. Den esfera di fe semper lo tin preguntanan i semper lo tin preguntanan sin contesta. Pasobra fe ta keda un misterio. Pero si, tin hopi "cortina" cu no ta Dios a baha, sino un falta di conosementu. Nan si, nos por yuda lanta, un pa un. Por sierto, Reino di Dios ta parse un tesoro scondi den tera. Cu cada pregunta cu bo ta hasi, bo ta kita e tera pa yega na e "cofre" mes di tesoro. Hopi di esnan cu a bandona e tesoro aki di Fe Catolico no a hasi mas minimo esfuerso aki. Nan no a siña, nan no a puntra, nan no a descubri con grandi i con presioso e Tesoro ta, ta p'esei sin ningun pena, nan a cambie pa un otro pida tereno, cu tal bes tabatin algun palu di flor ariba, pero nada den su paden. Reino di Dios ta un Tesoro scondi den tera, tin biaha asina scondi, cu riba tera bo no ta sospecha e balor di e tereno. Pa bo apresie i balorise, pa bo no cambie muchu lihe pa un cunucu floria, pero bashi den su paden, miho conose su profundidad. Lo mi hasi mi best pa contesta cada pregunta den e seccion aki: PUNTRA PA BO SA. Tal bes no e mesun ora of e mesun dia. Tene pasenshi, apoya mi cu bo orashon i contesta lo bin. Animo!
Awor bo por lesa tambe contestanan na e preguntanan cu otro hende a hasi caba i algun dia contesta na bo propio pregunta tambe.
Aki bo por hasi bo pregunta relashona cu Fe, Palabra di Dios, Iglesia i bida cristian. E contesta lo bo lesa pronto den e seccion di "Puntra pa bo sa". Bo pregunta lo yuda otronan tambe compronde miho diferente aspectonan di nos bida den fe.