Orashon

Ki grandi ta Bo bondat, Señor. Atrobe Bo a habri un dia nobo pa nos. Huntu ku paranan, huntu ku e promé rayonan di solo mi kurason tambe ta ofresé Bo e kanto di gratitut:
Bendishoná Bo ta, Tata Santu
pa e sosiegu di anochi,
pa e regalo di bida,
pa e portanan habrí di un dia nobo,
pa e solo, legria di mi kurason,
i pa e amor, goso di mi alma;
Bendishoná Bo ta, Señor Hesukristu, pasobra den Bo tur mi speransanan ta, pasobra Abo ta mi Kaminda, Bèrdat i Bida; Abo ta e Solo di Resurekshon i Eternidat, den Bo mi ta biba, move i eksistí; Abo lo guiá mi na awanan trankil; Bendishoná Bo ta Dios Spiritu Santu, Lus di mi kaminda, Rosea di bida, Kandela di amor, Palomba di pas, Amigu di mas fiel.
Gloria na Tata, na Yu i na Spiritu Santu, gloria i alabansa i bendishon for di profundo di mi alma. Amèn.

Drama Bo bendishon, Señor, riba e dia aki, ku habriendo su portanan, ta habri pa mi speransanan di algu nobo, algu ku fo’i tempu kaba ta skondí meimei di e anhelonan di mi kurason.
Bendishoná tur e oranan i tur e kamindanan di e dia aki. Laga Bo Providensia triunfá riba tur su akontesimentunan i hasi mi speransanan bira realidat.
Bendishoná tur esnan ku lo kompartí e dia aki ku mi, esnan ku lo aserká mi ku konfiansa pa haña konsuelo i apoyo.
Bendishoná mi kas, mi famia, mi amigunan. Laga nos sinti Bo protekshon paternal, kana den Bo presensia i biba pa Bo gloria. Amèn.