Orashon

Danki, Señor, pa e ratu aki di por sosegá banda di Bo. Bo ta manera un riu di awa fresku ku ta kore den mi alma. Mi kurason tin set di Bo, mi kurpa kansá ta anhelá bo.
Mare mi por hundi mi ser den e awanan fresku di Bo presensia. Mare mi por bebe e awanan bibu di Bo Spiritu anto refreská e kalor di e dia, rekuperá brio i sonrisa pa e resto di e oranan, pa e kaminda smal ku mi tin ku kana promé ku solo lo baha, anto atrobe lo mi por bolbe sosegá den Bo brasanan.
          Refreská mi mente, Señor, pa e kalor di ansha no kim’é, no hasié bira steril;
          Refreská mi lenga, pa mi palabranan bolbe floresé manera flornan di kunuku;
          Refreská mi pianan kansá, pa nan haña forsa nobo i no trompeká riba e piedranan di kaminda;
          Refreská mi mannan, pa nan por sostené esnan ku ta kansá.
Hundi mi den e awanan fresku di Bo amor,  di Bo miserikòrdia i Bo grasia. Laga mi sosegá un ratu i bolbe lanta mas fuerte ku nunka. Despues laga mi kana ku brio e kaminda di mi destino, anto ora solo  baha, laga mi bolbe kant’i riu di Bo presensia. Amèn.