Ta parce cu ta masha dificil pa maneha Beibel,
pero no t'asina !
Por parti e Buki di Beibel na e siguiente manera pa por move den dje mas fasil:
TESTAMENT BIEU
1. LEY: Genesis, Exodo, Levitico, Numbernan, Deuteronomio.
E bukinan aki ta tocante ley di Moises, dies mandamentonan, diferente leynan y costumbernan hudiu.
2. HISTORIA: Yoshua, Huesnan, Ruth, 1 y 2 Samuel, 1 y 2 Reynan,
1 y 2 Cronicanan, Esdras, Nehemias, Tobit, Judit, Ester, 1 y 2 Macabeonan.
Nan ta papia di historia y cultura di pueblo di Israel; di su fracasonan y su victorianan cu ta depende semper di fieldad di pueblo na Señor Dios. T'E ta e prome personahe di su historia.
3. SABIDURIA: Job, Salmonan, Proverbionan, Predicador,
Canto di tur Canto, Sabiduria, Sirag.
E amor pa sabiduria ta e topico principal di nan tur. Sabiduria no ta un simpel conocemento sino un bida den santidad, den obedencia na Dios. Den forma di drama, di poesia of orashon e bukinan aki ta guia pueblo na encuentro cu Dios, pasobra solamente esun cu ta biba den union cun'E ta berdaderamente sabi.
4. PROFESIA: Isaias, Yeremias, Lamentonan, Barug, Ezekiel, Daniel, Hoseas, Yoel, Amos, Abdias, Yonas, Mikeas, Nahum, Habakuk, Sofonias, Hagai, Zacarias, Malakias.
E bukinan aki ta trece e mensahenan di hendenan cu Dios mes a scohe y a hunta cu su Spirito pa nan sea e consenshi di pueblo. Nan mishon tabata; anuncia, coregi, adverti y guia e pueblo riba camindanan di fe.
TESTAMENT NOBO
1. EVANGELIONAN: Mateo, Marco, Lucas, Huan.
Den tur e cuater bukinan aki ta papia di bida di Hesu Cristo, su mensahe y su obra di salbashon.
2. ECHONAN: Echonan.
E buki aki ta mustra con e prome comunidad cristian a crece. Maske nan
historia no tabata liber di persecushon, e ta marca cu presencia y forsa di Spirito Santo.
3. CARTANAN: Romanonan, 1 y 2 Corintionan, Galatanan, Efesionan, Filipensenan, Colosensenan, 1 y 2 Tesalonisensenan, 1 y 2 Timoteo, Tito, Filemon, Hebreonan, Hacobo, 1 y 2 Pedro, 1,2 y 3 Huan, Hudas.
Pa motibo di ausencia di Apostelnan den e diferente comunidadnan y e necesidad di fortalece y guia nan fe, Apostelnan a dicidi di scirbi e cartanan aki. Nan ta manera un prolongashon di nan predicashon.
4. REVELASHON: Revelashon (Apocalipsis).
Esaki ta un vishon di Huan, yen di imagennan simbolico tocante futuro di Iglesia y di mundo. Tambe e ta spiertamento y anuncio di segundo binimento di Hesu Cristo.
Pa por haña tal of otro texto den Beibel mas facil, cada buki a keda parti den capitulonan y cada capitulo den versiculonan.
Mira e ehempel aki:
E numbernan grandi, manera: 1 , 2 , 3 ta marca e capitulonan den cada buki di Beibel.
E numbernan chikito, manera: 1 , 2 , 3 coloca meimei di e texto ta marca e versiculonan.
Conociendo e sistema aki sin problema bo por haña cualke texto cu bo ta desea, basta bo conoce loke yama: "cita". Cita biblico ta e leternan y numbernan cu ta bisa cua ta e buki, cua ta e capitulo desea y cua ta e versiculonan.
Pa marca un cita, na prome luga bo ta scirbi e abreviashon di e buki, depues e number cu ta marca e capitulo desea, anto despues di un coma bo ta pone e number di e versiculo. Por ehempel:
Gen 1, 31 Esaki kier men: buki di Genesis, capitulo 1, versiculo 31.
Ex 20, 1-17 Esaki kier men: buki di Exodo, capitulo 20, versiculonan: 1 te cu 17.
Hua 10, 1. 9-11 Esaki kier men: buki di Evangelio di Huan, capitulo 10, versiculo 1 y 9 te cu 11.
Lk 23, 1-24,12 Esaki kier men: Lucas, capitulo 23, versiculo 1, te cu capitulo 24, versiculo 12.