Ta parce cu ta hende studia so por saca probecho di Beibel,
pero no t'asina!
Por cierto pa hasi analisis of miho bisa exegesis di un of otro buki di Beibel mester tin hopi conocemento. Na prome luga di e idioma den cua e buki a keda scirbi, y tambe di e ambiente cultural di e autor. E conocemento aki no ta na alcance di tur hende. Tampoco ta na alcance e conocemento corecto di expreshonnan biblico. Sa sosode cu ta falta un fundeshi solido di fe, anto e ora ey e interpretashon por bai un caminda totalmente robes y hiba na conclushonnan kiboca. Esey ya apostel Pedro a ripara y cu preocupashon el a adverti: "Realisa cu e pasenshi cu Señor tin cu hende ta sirbi pa duna nos e oportunidad pa haña salbashon. Ta e cosnan aki mes nos kerido ruman Pablo a scirbi boso, cu e sabiduria cu Dios a dun'e. Den tur su cartanan el a papia cu boso tocante e puntonan aki, aunke tin algun cos un tiki dificil den su cartanan. Hendenan ignorante y debil den fe ta troce e cosnan aki, mescos cu nan ta troce otro partinan di Scritura y asina nan ta hinca nan mes den perdishon" ( 2P 3, 15-16).
Ta pesey den e interpretashon literal aki di Beibel nos ta tene nos cu confiansa y fieldad na e autoridad apostolico di Iglesia. Ta na apostelnan Hesus a bisa: "Bai anto y hasi e hendenan den tur nashon Mi disipel... y siña nan cumpli cu tur loke Mi a manda boso"
(Mt 28, 19-20). Apostelnan, esta obisponan, tin e ministerio di educa. Nan tambe como autoridad di Iglesia tin un preparashon adecua encuanto Santa Scritura, tradishon cristian y fe.
Tur esaki no kier men cu hende comun no por lesa of saca ningun probecho di Beibel. Pafo di e exegesis literal e Beibel tin un mensahe spiritual pa cada persona en particular. Cada ken cu les'e por haña den dje e berdad di su propio bida.
Beibel pa cada hende ta manera un spil cu ta bis'e cu frankesa kende e ta. Por ehempel bo ta habri Beibel y bo ta haña un texto: "Keridonan, laga nos stima otro, pasobra amor ta bini di Dios" ( Hua 4, 7). Kico bo ta mira den e "spil", esta den e Beibel? Bo ta mira un hende cu no ta stima otro hende. Anto ken ta e hende ey? Abo! Pasobra ta abo a lesa e texto, ta na abo Dios a dirigi e palabra ey.
Pa compronde bon mensahe di Beibel, mester descubri su sentido moral, alegorico i anagogico.
"Bo palabra ta un lampi pa mi pia, un lus riba mi caminda" (Sal 119, 105). Esey Beibel ta pa cada persona cu ta les'e, buscando den dje no cosnan pa discuti, sino corecshon pa su propio bida. Esaki yama: sentido moral di Beibel . Anto esaki ta alcansabel pa tur hende. Tur hende por saca afo cua ta e conducta agradabel den bista di Dios, segun scrituranan.
Esnan cu ta lesa Santa Scritura mas frecuentemente y ta medita riba dje, esnan cu ta atento maske ta durante predicashi di pastor riba djadumingo, facilmente ta descubri den dje un sentido mas, cu yama: sentido alegorico. E ta habri e horizontenan maraviyoso den cual e misterio di salbashon ta domina cu claridad manera solo. Den e acontesimentonan antiguo bo ta mira anuncio- y figuranan di temponan mesianico. Por ehempel e pasamento dor di lama Cora ta un signo di victoria di Cristo riba morto, ta un figura di Bautismo y anuncio di un triumfo definitivo di pueblo di Dios. ( Lesa: 1Co 10, 2).
Ora nos sigui e direcshon aki di medita riba Beibel, un sentido mas lo habri pa nos, cu lo hiba nos pensamento na nos Patria di Shelo y lo laga nos mira e acontesimentonan biblico den e nificashon eterno. E sentido aki yama: sentido anagogico. ( Anagoge kier men: hiba of guia). Por ehempel Iglesia ta e signo di Herusalem Celestial. ( Lesa: Rev 21, 1-22, 5).
Corda cu si algun texto di Beibel hinca bo den duda of inspira pensamentonan contrario na e fe den bo, anto consulta cu pastor di bo parokia inmediatamente. No lubida cu satanas tambe ta usa textonan di Beibel pa troce caminda di hende. (Lesa: Mt 4, 5-6).