Ta parce cu ora Beibel ta usa cifranan e ta exacto,
pero no t'asina !
Beibel no ta un buki cientifico sino un mensahe spiritual di fe. Pesey, maske den cierto relatonan historico e ta exacto, tog no ta esey ta su preocupashon sino e presencia y obra di Dios den historia. Facilmente bo ta haña bo cu datonan diferente (si ta trata di cifranan), maske nan tur ta papia di e mesun acontecimento. Por ehempel: Cuanto aña israelitanan tabata na Egipto? Bo ta haña e siguiente contesta: segun buki di Exodo 12, 40 nan a biba aya 430 aña; segun Genesis 15, 13 : 400 aña. Pero Genesis 15, 16 ta papia di cuater generashon. Nos ta tuma mas of menos 40 aña pa un generashon, anto e ora ey ta resulta cu nan a biba aya 160 aña. E cifranan aki no tin importancia pa nos. ciencia historico of arkeologico por investiga pa haña un contesta exacto. Pa mensahe di Beibel e importancia ta loke Dios a hasi cu catibonan israelita na Egipto, con El a laga nan sali liber y a guia nan pa tera cu E mes a priminti nan.
Tin otro cifranan puramente simbolico presente especialmente den relatonan apocaliptico. Tuma nan literalmente ta un kibocashon grandi.
Cifranan den Beibel ta sconde un nificashon secreto, ta simbolisa algo cu tabata conoci pa e lector di e teranan ey y e temponan antiguo, pero a bira misterioso pa nos.
Pero tog cu ayudo di exegesis hopi di nan a keda decifra. Ata algun di nan:
3 E number aki ta liga cu locual ta dibino, hopi biaha ta simbolisa Dios su presencia. (Rev 21, 13; Gen 18, 1-8).
3½ Tres y mei ta mitar di shete. Ta simbolisa maldad, pasobra maldad nunca lo triumfa, e ta yega na mitar di caminda so. Un tempo cu no ta completo. (Rev 11, 9. 11; Dan 9, 27).
4 Integridad cosmico; henter e creashon. (Rev 4, 6; 9, 15).
7 Perfecshon, totalidad (pasobra siman tin shete dia). (Mc 8, 5-8; Lc 8, 2; Rev 1, 4; 4, 5; 5, 1. 6).
10 Totalidad sera; perfecshon: 10 mandamento (Ex 20, 1-17), 10 leproso (Lc 17, 12-19), 10 cachu (Rev12, 3; 13, 1; 17, 3).
12 Cumplimento di historia di salbashon, perfecshon celestial: 12 tribu (Gen 35, 22-26), 12 apostelnan (Mt 10, 2 ss), Muher cu 12 strea (Rev 12, 1), 12 anciano dilanti di trono di Dios (Rev 4, 4), 12 mil di esnan cu a haña seyo (Rev 7, 4-10), 12 piedra di fundeshi (Rev 21, 12 ss).
24 Henter e pueblo di Dios, di Testament Bieu y Testament Nobo: 12 + 12 (Rev 4, 4).
144 Tur cu a keda elegi, un cantidad inmenso, 12 x 12 x 1000 ( mil ta nifica un cantidad incontabel) = 144 000. E cifra aki ta nifica un cantidad asina grandi cu no por conta. (Rev 7, 4-9).
666 Anticristo (Rev 13, 18). Corda cu cifra: 12 ta simbolisa perfecshon celestial, pues, mitar di 12, esta: 6 ta simbolisa maldad y negashon di Dios. Mescos cu cifra: 7 ta simbolisa loke ta sagrado, pero tur locual ta menos cu shete no ta di Dios. Tres bes 6, esta 6 6 6 ta simbolisa e maldad di mas grandi posibel. Manera Cristo ta e amor mas grandi posibel, asina anticristo lo ta e maldad di mas grandi posibel.