Ta parce cu apocalipsis lo keda un misterio,
pero no t'asina
Apocalipsis ta un sorto di literatura cu ta transmiti Dios su revelashon bou di simbolonan y visionnan espectacular. Maske e buki di Apocalipsis (na papiamento: Revelashon) ta e ultimo den Beibel, tog e ta presente tambe den otro bukinan, manera Ezekiel, Daniel y Zacarias.
Buki di Revelashon, maske scirbi na un manera simbolico of te hasta fantastico, ta trece un mensahe cla y importante pa Iglesia y pa mundo. Por parti su contenido den cinco topico:
1.Cartanan pa shete iglesianan (capitulo 1-3),
2.Castigo di Dios y suerte di humanidad (cap. 4-11),
3.Suerte di Iglesia (cap.12-16),
4.Derota di enemigonan (cap.17-20),
5.Victoria definitivo di Cristo y Herusalem Nobo (cap.21-22).
Pa compronde e lenga di apocalipsis bo mester conoce nificashon simbolico di su ekspresionnan.
Ta bou di nan, manera bou di un casca duro a keda scondi y protehi e simia di un mensahe di hopi importancia pa futuro di Iglesia y di mundo, un yamada serio pa persevera den fieldad na Cristo, un advertencia cu lo bin temponan di persecushon cruel, di un aparente triumfo di maldad di satanas. Pero finalmente esnan cu keda fiel te na fin lo contempla triumfo definitivo di Cristo y di Iglesia y lo habita e Herusalem Nobo.
Ata e nificashon di algun di e simbolonan apocaliptico:
Cabes inteligencia
wowonan conocemento, ciencia
alanan omnipresencia
cachonan forsa, poder
pianan stabilidad, persistencia
diadema poder, dominio
streanan yiunan di Dios, esnan fiel na Cristo
dragon satanas
bestia mensahero di satanas
prostituta esnan cu ta infiel
paña largo sacerdocio, sirbishi na Dios
rama victoria
spada destrucshon
colo blanco legria, victoria, puresa
cora sanger, martirio
scarlata dignidad
Asina pues, por ehempel e texto: "A aparece un otro señal mas na shelu: un dragon grandi cora cora cu shete cabes y dies cacho y riba cada cabes un diadema. Cu su rabo el a bari kita un tercer parti di e streanan na shelo, y a benta nan riba tera." (Rev 12, 3-4 b), nos ta compronde cu satanas lo usa tur su inteligencia (shete cabes), henter su forsa (dies cacho) pa plama su poder (diadema riba cada cabes) dramando sanger (cora cora) di yiunan di Dios (a bari kita un parti di streanan). Esaki ta un anuncio di temponan di persecushon y martirio y di un guera di reino di scuridad contra reino di Dios. Un guera cu lo caba cu segundo binida di Cristo y su triumfo eterno.