Orashon ta esencial pa nos bida moral y religioso. E raiz di nos bida ta consisti di un relashon liber y consciente cu Dios cu ta dirigi tur cos den nos. Den e contactnan social di tur dia nos actitud moral pa cu nos prohimo ta keda expresa. Nos lucha spiritual ta expresion di nos actitud moral pa cu nos mes. Nos orashon ta refleja nos actitud pa Dios y nos actitud pa Dios ta refleja su mes den nos orashon. Como no ta tur hende tin e mesun actitud e forma di reza tampoco ta mescos. Nos por dividi e actitud aki den tres categoria. Actitud di esun cu no ta preocupa pa su salvashon y tin un actitud indiferente pa Dios. Esaki ta e persona cu ta neglisha su orashon. mescos cu e ta neglisha cosnan den su bida. E ta resa den misa of na cas manera semper el a costumbra di hasi, pero sin atenshon ni sentimento. E ta resa di custumber. Actitud di esun cu sí a renuncia na pica y ta trata na hiba un bida di birtud. Aunke e no a experimenta e encuentro cu Dios. E ta traha pa Señor pero mas bien di un forma exterior. Esaki ta e persona cu ta hasi hopi orashon y ta bai misa regularmente. Aunke e ta lesa orashonnan for di bukinan spiritual y ta trata na biba loke e ta lesa, su bida ta keda superficial y no ta logra drenta den su mes cu Dios. Actitud di esun cu a experencia Dios den e profundidad di su ser y ta keda den Su presencia. Esaki ta e persona cu ta keda cu su mente den Dios y ta resa den e silencio di su curazon sin wordu distrai. E por keda hopi ora largo dilanti di Dios sin usa palabra y frasenan largo. E tin un comunicacion profundo y silencioso cu Dios. Cada categoria di persona y cada grado di crecimento den Dios tin su propio forma di orashon su mes regla. Ta importante pa realisa cu bo mes no por guia y dirigi bo mes.den e proceso aki y cu ta esencial pa wordu instrui y guia pa esnan cu tin experiencia.