Rev. Carlos Fernando Donado Silva
Kurso riba Evangelio di San Marko
E meta di e kurso aki ta pa yuda nos komprondé e mensahe di San Marko mihó, i tambe yuda nos profundisá nos fe den Hesus, i renobá nos atheshon personal p’É i konfirmá nos kompromiso pa sigui’É riba e kaminda di bida. Awe Marko ta invitá nos pa sigui e pasonan atrobe ku Hesus a tuma pa buska boluntat di Dios e Tata. E biahe ta di Galilea pa Herusalèm, e lugá di e krus i resurekshon. Den e rekorido aki e ta presentá nos e programa di e reino: di amor i fraternidat, di hustisia i di pas, kaminda tur ser humano ta risibí pa Dios i por haña felisidat.
Mi ta spera ku e kurso aki lo yuda nos resa, fortalesé nos fe , renobá e konfiansa den Dios nos Tata, wak e akontesimentunan di nos bida ku e mirada di Hesus, selebrá i gradisí presensha di Señor den nos eksistensha.
E kurso aki ta dirigí na un manera spesial, na animadó di gruponan i kolaborador di evangelisashon den nos parokianan. E por yuda tambe den nos selebrashon di e Palabra. E kurso aki ta solamente un yabi pa lesa e evangelio di San Marko. E ta konsistí di nuebe kapítulo.
E promé ta un introdukshon. Marko ta entregá nos e mapa di e tesoro i ta deskribí e ruta di e biahe. Den kapítulo 2 pa 7 nos ta rekoré e diferente etapanan di e kaminda, for di lago di Galilea te Kalvario na Herusalèm. Kapítulo ocho ta relatá importansha di fe pa esun ku ta komprometé su mes pa ta riba e kaminda ku Hesus. E fe aki ta nase for di e siguridat ku Hesus resusitá ta bai nos dilanti i ta usa su poder na nos fabor. San Marko ta insistí ku Hesus ta usa e poder ei pa kore ku demoño. Aktualmente tin hende o grupo ku ta abusá di e miedo ku hende tin di e tema aki. Kapítulo nuebe ta amplia riba e vishon i ta papia di e tera i di e hendenan unda “e Kaminda di Hesus ta pasa”. E kapítulo aki ta yudabo komprondé e situashon di e pueblo den tempu di Hesus i ta pone lus riba e mishon di esnan ku awendia ta anunsiá E Bon Nobo di Dios na pobernan.