LÈS No. 2
Marko 1:16 - 6:13
Kuminsamentu dje enkuentro ku Hesus.
E entusiasmo di e promé amor.
Den e promé seis kapítulonan Hesus kasi no ta para ketu. Semper e ta move.
E disipelnan ta bai tur kaminda ku n’e: playa, riba kaya, den seru, den desierto, den boto, den snoa, den kasnan, den pueblo, den henter Galilea. Ta hala rosea ku entusiasmo.
Den kuminsamentu semper e entusiasmo ta grandi. Ku nos ta pasa meskos. Ora bo bira miembro di un komunidat òf di un grupo bíbliko, bo ta sinti hopi entusiasmo. Meskos ta pasa ora un hende kuminsá ku trabou pastoral, sigui un seminario, forma parti di un grupo. Ta e entusiasmo di e promé amor.
Den evangelio di Marko e mesun sintimentu ta aparesé. Tur kos a kuminsá ku e yamada kantu di e lago (1,16-20) i a krese poko poko te ora e disipelnan a risibí un partisipashon den e mishon di Hesus. (6,7-13). Einan manera ta parse e kaminda a drenta un bògt i e paisahe a kambia. Laga nos wak di aseka e momentonan mas importante di e entusiasmo inisial. Wak bon den e spil ei, si abo i bo komunidat ta rekonosé otro den e “luna di miel” di e promé disipelnan ku a sigui Hesus.
• Wak bo mes den spil.
Nan ta piskadó, ta traha nan ta traha. Ta nan trabou. Hesus ta pasa i yama. Nan ta bandoná tur kos i sigui Hesus. Parse ku esei no tabata niun problema. Nan ta bandoná famia, nan barku i redanan. (1,16-20; 2,13-14). Sigui Hesus ta kousa kiebro. Nan ta kuminsá forma grupo, e komunidat di Hesus ta un komunidat ambulante (3,13-14,34)
E disipelnan ta kompañá Hesus unda ku e bai. Nan ta drenta ku n’e den snoa i den kas dje pekadornan. (2,15). Nan ta keiru kuné den kunuku (2,23), nan ta bai laman kuné (3,7), nan tabata keda so ku Hesus i nan por a interog’é.
(4,10.34). Na ta bai su kas, nan ta kombibí kuné, i nan ta bai te na su tera Názarèt (6,1), nan ta krusa laman huntu. (5,1)
Nan ta partisipá den e parti difísil di e mishon. Tantu hende ta busk’é ku nan no tin ni tempu di kome (3,20). Nan ta kuminsá sinti nan mes responsabel pa bienestar di Hesus. E konvivensia ta mas íntimo i familiar. Hesus ta duna algun di nan un beinam. (3,16-17). E ta kura e suegro di Pedro (1,29-31).
Andando ku Hesus nan ta sigui su direkshon nobo. Nan ta kuminsá realisá kiko ta importante òf no den bida (2,23-24; 2,15; 7,2; 2,18). Hesus ta defendé nan (7,6-13). Nan ta alehá di kosnan di ántes. Ta su famia nobo (3,33-34).
Nan ta risibí formashon, Hesus ta splika nan e parabelnan ku hende a kontá nan (4,10-11,34), ora nan ta na kas.
Despues Hesus ta yama diesdos di nan pa kompañ’é, nan ta haña e mishon di anunsiá e bon notisia i di kore ku demoño (3,13-14). Nan ta asumí e mishon huntu ku Hesus (6,7-13). Pa yega te einan nan mester a tuma posishon banda di Hesus i arma nan mes ku kurashi pa kibra ku hopi kos. Den tur e kosnan aki e entusiasmo di e promé amor ta reflehá.
• Rais di e entusiasmo.
E kuminsamentu bunita aki ta marká ku e presensha masivo di e pueblo i pa e plamamentu kresiente di e Bon Nobo ku ta ekstendé rápidamente den henter Galilea (3,7-10), spesialmente den e grupo marginá : esnan poseshoná, hende malu, leprosonan, paralítikonan, pekadornan, kobradónan di belasting (1,23.30; 2,3.15; 5,15.28). Tur ta sinti nan mes aseptá i kurá.
Den rais di tur esaki tin e persona di Hesus ku ta yama. Tin e Bon Notisia di e Reino ku ta atraé. Nan ta sigui Hesus, nan no sa ainda kiko esei ta nifiká, pero pa aworakí no ta importá.
Pa reflekshoná.
• Kon awendia ainda e entusiasmo di e promé amor den mi bida òf den mi komunidat ta manifestá?
• Kua ta e motibu di e entusiasmo di e promé amor den mi bida?