Na Misa

LÈS No. 5

Marko 11:1 ⇒ 13:37

Opstákulonan i konekshonnan destruí den Hesus su kaminda.

Den kapítulonan 11 i 12 e siñansa ta sigui pero awor no ku palabra pero ku akshon i testimonio. Evangelio di Marko hopi bes ta referí na mas ku un hende (nan), suponiendo ku Hesus ta kompañá pa Su disipelnan (11:1.12.15.20.27...). “Nan ta sigui Hesus, nan ta kuné i ta partisipá na tur loke E ta hasi”. Tur kos ta sosodé na Herusalèm meimei di e tenshon entre Hesus i outoridatnan. Nan ta biba e konflikto lokual ta aprobá ku nan ta ku Hesus. A yega e ora pa komprondé i pone den práktika lo ke ta nifiká “sigui Hesus i karga ku e krus”. Identifiká ku Hesus.

Meskos ta pasa ku nos tambe. Den un kurso di beibel, retiro, reunion o misa, bo ta tende nan papia di amor, hustisia, fraternidat....Bo ta keda enkantá. Sinembargo ta ora bo yega kas, ku famia, bisiña, na trabou, den tienda o riba kaya; e ora ei bo ta komprondé konkretamente lo ke ta nifiká realmente amor, hustisia i fraternidat. Meskos e disipelnan, kanando ku Hesus for di Galilea, a risibí den teoria e siñansa di krus. Pero ta na Herusalèm durante e akontesimentunan nan ta eksperimentá lo ke ta e krus i kiko ta su konsekuensia i eksigensia. Laga nos kompañá Hesus na Herusalèm. Hesus a karga e krus ei pa nos pero nos tin nos propio krus ku nos tin ku pasa pa identifiká ku Hesus. Tur kristian mester tin un krus, tur siguidó di Hesus tin un krus. Disipelnan di Hesus a komprendé siñansa di Hesus pero na ora di bèrdat nan no a tuma su krus kuné.

•    Hesus ta keda mantené Su kaminda (11:1-11).
Un par di dia promé ku Pasku Hesus ta drenta Herusalèm kompañá pa su disipelnan i algun peregrino di e pueblonan di Galilea. Nan ta drenta ku e Mesias rei gritando: “Bendishoná ta esun ku bini den nòmber di Señor” (11:9). Hesus ta aseptá e homenahe ku reserva. Sintá riba un buriku (11:7) E ta rekordá e profesia di Zakarias ku ta bisa: “ Un rei ta aserkando, humilde riba un buriku. Lo e kibra e flecha i bog di guera (zak 9:9.10). Hesus no ta aseptá ser Mesias Rei guerero, Hesus ta demostrá ku E ta un Mesias di pas subiendo riba un buriku, buriku ta pa karga, señal di sirbishi.

•    Hesus ta kibra ku e kulto i religion tradishonal (11:12-26).
Su manisé Hesus ta bolbe drenta e tèmpel. E ta saka tur bendedó afó i basha mesa  di esnan ku ta kambia plaka abou (11:15-16). Pa Hesus tèmpel mester ta kas di orashon pa tur hende i no un kueba di ladron (11:17). Awor outoridatnan ta buska moda pa kaba kuné. Disipelnan mester siña di e lès aki: Sigui Hesus ta peligroso. Bo mester di kurashi pa aseptá hasta morto i pa denunsiá falta sin miedu di muri.

•    Hesus ta kibra ku e saserdotenan importante, dòktornan di lei i ansianonan (11:27-12:12).
E hendenan aki  ke sa ta ku kua outoridat Hesus tabata hasi e kosnan (11:28). E no a respondé. E no mester di nan pèrmit pa aktua (11:33) i E ta anunsiá ku nan lo pèrdè e kondishon di pueblo eskohí (12:1-11). Atrobe outoridatnan ta disidí di mat’é pero nan tin miedu di e pueblo (12:12). Disipelnan mester sa ku esun ku ta ku Hesus ta kore e rísiko di ser pèrsiguí pa e mesun outoridat aki.

•    Hesus ta kibra ku fariseonan i herodianonan (12:13-17).
Esakinan tabata e hefenan lokal di e pueblonan di Galilea. Den pasado ya nan a disidí di mata Hesus (3:6). Awor nan ta proboká. Nan ke sa si E ta na fabor o kontra di paga belasting na e Romanonan (12:14). Hesus no ta respondé, ni sikiera E ta kontestá. E ta eksigí ku nan mester duna Cesar lo ke ta di Cesar i duna Dios lo ke ta di Dios. Ku otro palabra pa nan trese e pueblo desorientá bèk na Dios. E disipelnan tin hopi di siña ainda, nan wowo (bista) tabata siegu pa e zürdeg di e fariseonan i e herodianonan.

•    Hesus ta kibra ku e saduseonan  (12:18-27).
E saduseonan tabata e aristokratnan élite, komershantenan i doñonan di tera. Nan tabata konservador, nan no tabata kere den resurekshon. Nan tabata kuestioná fe di Hesus. Hesus tabata kontestá nan  severo: “Boso ta bon kiboká pasobra boso no ta komprendé Skritura ni poder di Dios... Boso ta kompletamente robes (12:24-27). Otro aviso pa e disipelnan: esun ku ta di banda di e saduseonan ta kontra Dios.

•    Hesus ta kibra ku dòktornan di lei (12:28-40).
Dòktornan di lei tabata esnan responsabel pa e doktrina ofisial. Molostiá pa e siñansa di Hesus na a sembra kalumnia ku Hesus ta poseé (3:22). Hesus ke sa kiko nan ta pensa di Mesias (12:35-37). E ta kondená nan komportamentu hipókrita i egoista (12:38-40), pero E ta rekonosé algun kualidat di nan (12:34). Hesus ta insistí ku disipelnan mester tin kurason i mente habri pa por distinguí siñansa di e dòktornan di lei.

•    Hesus ta mustra kiko ta boluntat di Dios (12:41-44).
Den e momentunan di tenshon aki e disipelnan ta kompañá Hesus. Un dia, sintá den tèmpel dilanti e lugá di ofrenda, Hesus ta mustra nan riba e gesto di un biuda pober ku ta kompartí tur loke e tin pa biba. E disipelnan tabata pensa ku nan mester tin hopi plaka pa resolvé e problemanan di e pueblo. Un pregunta di nan: “kon nos ta hasi kumpra pan pa tur e hendenan aki kome ku solamente 200 dinario” (6:37)? Pa esun ku ta pensa asina e sèn di e biuda no ta sirbi pa nada (12:43), pero pa Hesus e biuda a duna mas ku tur sobrá (12:43).  Hesus ta pensa diferente. Mustrando e disipelnan riba e gesto di e biuda e ta siña nan i nos, unda nos tin ku buska manifestashon di boluntat di Dios: serka e pobernan i kompartiendo ku otro.

Despues di kibra ku tur hende i tur kos Hesus ta sali for di stat. E ta bai sinta riba seru di Oleifi ku kara pa e tèmpel. E ta terminá e siñansa, esaki ta su último diskurso. Tin únikamente 4 disipel huntu kuné: Pedro,  Hakobo, Huan i Andreas. Nan tabata ansioso pa sa kiko ta bai pasa ku e tèmpel i ku fin di mundu. Hesus su kontesta mester aklará e rason di pèrsekushon i e nesesidat di vigilá. E diskurso ta konsistí di 5 parti.

1.    Mk 13:5-8 no laga niun hende gaña boso. No keda alarmá ku rumornan di guera, lo no ta e fin ainda.
2.    Mk 13:9-13 boso lo wòrdu pèrsigui pero no tene miedu ni no preokupá. Spiritu Santu lo ta ku boso.
3.    Mk 13:14-27 deskubrí kon tempu ta, pa bo sa unda Dios ta yegando i unda E ta aktuando. Esaki lo ta fuente di kurashi i lo yudabo konosé yegada di Yu di hende
4.    Mk 13:28-32 no ta tur señal ta bini di Dios. Solamente Dios sa e momento. “Ni e dia ni e ora ningun hende no sa, ni angelnan den shelu ni e Yu, solamente Tata”.
5.    Mk 13:33-37 lo ke mi ta bisa boso, mi ta bisa tur hende: “Paga tinu”.

Ken Hesus ta?
Den kuminsamentu Hesus a atraé hopi hende, e pueblo a vibra huntu kuné. Awor na final El a keda su so. Su último diskurso ta pa solamente 4 hende. Esaki ta un frakaso?

Pa Su moda di aktua i di siña Hesus tabata pone e hendenan sinti nan mes inkómodo i yen di pregunta. E hendenan tabata purba komprendé Hesus usando e konosementu i kreensha dentro di e kriterionan familiar pa nan: tèstamènt bieu, leinan di pais i tradishonnan di ántes. Pero e kriterionan ei no tabata sufisiente, Hesus no tabata pas den e skema ei, E tabata superior na tur e kosnan ei.

Ken Hesus tabata pa e pueblo, ki idea nan ta tin di dje?

•    Pueblo
Nan tabata atmirá su enseñansa pasobra e tabata siña ku outoridat no manera e dòktornan di lei (1:22). Nan tabata rekonosé i atmirá e notisia ku Hesus a trese. Apesar di e preferensha i atmirashon, pueblo no a deskubrí identidat di Hesus. Pa algun Hesus tabata Huan Bautista; pa otro e tabata Elias òf un di e profetanan (8:28; 8:14-16).

•    Famia i pueblo di Názarèt.
Famianan no tabata sa kiko di pensa di Hesus. Nan a pensa ku E ta loko (3:21). Su paisanonan di Nazaret no tabata mihó ku e famianan. Nan tabata konosé for di chikitu i nan tabata reakshoná bisando: “Ki mishi E ku tantu sabiduria asina i ku poder pa hasi milager? No ta Hesus, e karpinté, yu di Maria (6:2-3)?” (menospresio)

•    Outoridatnan.
Nan tabata sinti nan mes menasá ku e popularidat di Hesus. Nan a konden’é di akuerdo ku tradishon di ántes i di leinan di pais. E normanan i leinan vigente a deklará Hesus un violador p’esei nan a kohé presu  i akus’é pena di morto pa entre otro:
1.    Hesus a pordoná un hende lam
2.    Hesus a bishitá kas di hendenan ku no ta kumpli ku lei
3.    Hesus no ta obligá su disipelnan warda yuna
4.    Hesus ta laga e disipelnan traha den kunuku riba djasabra
5.    Hesus ta poseé pa Bèlzebu

•    Disipelnan.
Siguiendo Hesus nan lo ta parti di e pobernan i e viudanan, esnan ku no tin ni sèn ni poder i na fin nan lo ta na Herusalèm riba Kalvario. No tabata fásil pa e disipelnan. Nenga Hesus manera e mayoria o kere siegamente den dje i asina forma parti di e oposishon ofisial. No ta tin alternativa i pa straño ku por ta, despues di a biba tantu tempu ku Hesus, despues di a risibí tantu enseñansa di dje, tòg e disipelnan tabata siegu. Ku wowo pero sin por mira (8:18). Nan no a yega na kere.

 

 

pa bai na les 6>>