Konklushon.
Un di e títulonan mas bunita ku e promé kristiannan a usa pa deskribí e mishon di Hesus tabata: “Defensor”.
Na hebreo bo ta bisa “Go´êl”. Esaki ta un titulo pa e familiar mas serka ku mester a salba su rumannan ku tabata menasá di pèrdè tur nan propiedatnan (lv 25:23-55). Den Tèstamènt Nobo e terminologia aki tin vários tradukshon: salbador, redentor, libertador, abogado, ruman mayó, konsuelo (lk 2:11; Hn 4:42; Ech 5:31; etc). Hesus ta e ruman mayó ku a asumí e defensa i salbashon di su famia, di su pueblo. El a bin pa bin yuda tur su rumannan, hòmber i muhé, pa asina nan por a bolbe biba manera ruman ku otro. Esaki ta e sirbishi ku el a duna na esnan di dje i na nos tur. Asin’aki El a realisá profesia di Isaias, ku a anunsiá binida di e Mesias Sirbidó. E mes a bisa: “ Yu di Hende no a bin pa wòrdu sirbí pero pa sirbi i duna su bida pa salbashon di tur” (10:45).
Pablo ku e siguiente frase a ekspresá e eksperensha personal aki: “El a stimami i El a entregá su mes pa mi” (Gal 2:20). Loke a pone Hesus entregá su mes pa salba su rumannan, te e eksperensha ku E ta tin di Dios komo Tata. Si Dios ta Tata, e ora ei nos tur tin ku biba manera ruman ku otro. Esaki ta e kaminda berdadero ku Hesus a habri den bida di Su pueblo. Evangelio di San Marko ta invitá nos pa kana e kaminda aki for di Galilea kaminda tur kos a kuminsá, te na e kalvario di Herusalèm, kaminda tur kos ta finalisá i bolbe kuminsá ku resurekshon. Na final di e buki, manera un último anunsio di un amigu, Marko ta ofresé nos e siguransa: “E ta bai nos dilanti” (16:7). Ora nos komprendé i eksperimentá, ku sigui Hesus ta: bai tras di dje riba e kaminda di krus e kaminda di karidat i di sirbishi, e ora ei nos lo vense frakaso. Laga nos kana ku e siguransa ku E mes ta bai nos dilanti. Laga nos resusitá! Nos ta riba e kaminda ku Hesus.
Pa reflekshoná:
• Tur lokual bo a siña aki, kiko bo a gusta mas? For di kua bo a saka mas probecho? Di kon?
• Kua ta e mensahe sentral ku bo a deskubrí den evangelio di San Marko? Kon lo bo poné den práktika?
• Kon e lèsnan aki a yudabo komprendé i eksperimentá mihó ken Hesus ta pa bo i ken abo ta pa Hesus?