E tawata e prome escritor cristian y esun cu su textonan a ser lesa o scucha pa mas hopi miyon di person den henter mundo durante di e siglonan, aunke un parti importante di esnan cu a probecha su enseñansanan ta desconoce cu ta di dje o nan no sa ken e ta. Nan ta yam'e ‘apostel' (incluso ‘super-apostel') pero e nunca a pertenece na e grupo di Diesdos y no solamente esei: tawata tin un tempo cu e tawata persegui e cristiannan. Probabelmente e lo no gana un concurso di popularidad entre e feligresnan (fielnan), cu no ta custuma na encomenda nan mes na dje, manera nan ta haci cu otro santonan manera San Hose, San Hudas Tadeo of San Antonio. Dificilmente bo por haña un prenchi cu su imagen, y esunnan cu tin no ta represent'e cu un cara amabel of cargando e Niño Hesus, sino como un personahe rigido (seco), cortico, pelon, cu barba largo, cu un Beibel den un man y un spada grandi den e otro. E no ta sona masha atractivo, y sin embargo, Papa Benedicto XVI a decidi di celebra tur un aña na e existencia di e homber aki den un principio yama Saulo di Tarso y awendia conoci como San Pablo. Cua ta e rason pa e decision aki? Ken San Pablo tawata y ki ta e justificacion pa cu awe nos ta record'e?
E prome cos cu nos sa di dje ta cu e tawata contemporaneo di e prome comunidad cristian; e tawata hudiu y e tawata pertenece na e secta di e fariseonan, kendenan tawata caracterisa pa kere cu nan por a haña e salbacion si nan cumpli exaheradamente cu e lei, esta, e mandamentonan y e mandatonan cu Dios, dor di Moises, a dun'e pueblo hudiu. Mester nota si, cu na diferencia di hopi di e fariseonan hipocrita cu solamente tawata laga pasa cu nan ta cumpli, of cu nan a bai te na e extremo di haci e lei un idolo cu nan tawata pone prome cu tur cos, e realmente tawata busca di curason pa sirbi Dios; malo ta cu el a dedica tur su esfuerso na persegui e cristiannan, cu e tawata considera enemigonan di Dios dor cu nan tawata sigui Hesus, ken e dirigentenan di su pueblo a rechasa y a condena na morto. Kico Señor a weita den e homber aki cu no tawatin berguensa pa hiba preso muhernan y ancianonan, cu a haci hopi abuso, di cua un di nan tawata aproba e morto di San Esteban, e prome martir cristian? (lesa Ech 7, 58-8,1). El a mira sin duda cu e tawata kiboca, pero el a mira tambe cu su eror tawata di bon fe, cu tawata sali for di un curason puro, sin engaño, cu su unico intension tawata pa sirbie. Asina ta, e kier a probecha tur e candela ei, reorient'e, dun'e un sentido berdadero. Y un dia a sosode un encuentro cu a cambia e historia. Tres biaha e buki di Echonan ta conta nos e storia, pa nos capta e importancia di dje (lesa Ech 9, 1-9; 22, 5-16; 26, 10-18):
Riba un dia, ora cu e tawata bayendo pa Damasco pa sigui cu su persecusion di cristiannan, Señor a parece na dje den caminda y a cuestion'e: ‘Saulo, Saulo, pa kico bo ta persegui mi?', e ora el a puntra: ‘Ken bo ta, Señor?' (pa un hende cu ta asina sigur di sa kico ta e boluntad di Dios, ta significativo e echo cu e no ta reconoce Su bos ora cu E ta papia cu n'e...). Ricibi e contesta aki: ‘Mi ta Hesus, esun cu bo ta persegui'. E lus intenso cu a compaña e revelacion aki a hacie perde su bista (E cu te awor aki a kere cu e tin tur cos hopi cla); e palabranan cu e ta scucha ta inicia den dje un revolucion spiritual berdadero cu ta pon'e cuestiona tur loke cu te awor aki el a kere cu tawata berdad, cu ta pon'e pensa di nobo tur loke cu el a kere cu e tawata sa di Dios, cu ta bruha su ideanan y ta hacie comprond'e cu el a esforsa su mes tur e tempo por nada pa avansa pues el a bai den direccion kiboca. E ta keda tres dia y tres nochi sin come ni bebe, completamente ciego p'e mundo pero e ta cuminsa weita tur cos claramente pa prome biaha. E ta keda sera den su mes y sin haci nada aparentemente, pero ta tres dia increibelmente probechoso, no solamente p'e sino pa tur e cristiandad, pasobra den esei ta gesta (traha) loke for di e momento ei e ta dedica na predica incansabelmente, recoriendo pa lama y tera e regionnan mas dificil of distante (e tawata e prome den hiba e Bon Nobo pa Europa), dunando su testimonio di obra y palabra yen di balor, mescos na esnan cu ta scuch'e cu atencion como na esnan cu ta opone nan mes y cu no ta para te conden'e na morto. Y, ta cua ta e mensahe cu p'e ta bal di tal grado e pena cu e no ta import'e e mofa, presecucionnan, hamber y sed, friu, cansancio, latigazonan, naufragionan, seramento den prison y na final e martirio? Nos a descubrie entre su discursonan (registra puntualmente pa San Lucas, ken ta compañ'e den diferente di su biahenan), y, tambe, den e cantidad di cartanan cu e ta scirbi na e diferente comunidadnan cristian cu tawata wordo funda y cu cua e tawata mantene contacto, y cu awe ta constitui un legado bunita cu ta forma parti importante di e textonan extraordinario cu ta proclama den Misa. Ta e anuncio cu Dios ta stima nos cu un amor gratis cu no ta depende di nos meritonan y di cual nada por aparta nos; cu e prueba di Su amor ta cu a pesar di cu nos ta pecadornan el a manda Su Yiu no solamente comparti nos condicion humano sino na muri pa asina libra nos; cu el a resucita pa duna nos bida, y cu a manda nos e Spiritu Santo pa yena nos curason cu Su amor, don cu ta fortalece nos, ta capacita nos y ta hiba nos na biba como testigonan di Dje. Cu tur loke nos tin nos a ricibi di Dios; cu a yena nos cu Su misericordia, Su pordon, Su pas, donnan no mereci cu nos ta yama no solamente na disfruta sino na comparti semper y cu tur hende.
E espacio chikito no ta alcansa pa menciona e temanan incontabel y rico cu e apostel a menciona den su escrutinan! Awor por compronde pa kico Papa kier ofrece nos e espacio no tan reduci: tur un aña dedica na San Pablo, pa anima nos na conoce e apostel notabel ei (dor di loke San Lucas ta conta nos den e buki di Echos di e Apostelnan, y di loke nos por siña di dje mes dor di su cartanan), pa nos bira su amigonan y na custuma nos na pidie pa e resa pa nos pa asina, manera e, nos sa di laga nos wordo guia, docilmente, na e encuentro cu Hesus.
Laga nos prepara den nos parokia pa biba for di awo e "Aña Paulino" den 2008!
Laga nos no lubida cu...
San Pablo a scirbi e prome escrito (texto) di e Testament Nobo: e Carta na e Tesalonicensenan, probabelmente rond di aña 50. Tawata e esun cu a inaugura, pa bisa asina, e asunto di manda cartanan pa e comunidadnan cu, na cuminsamento di e cristianismo tawata tur loke esaki nan tawata tin (ainda e tempo ei e Evangelionan no a ser scirbi). Cu e rumannan a bai ta copia y distribui y cu asina ta con nan a yega na ta parti super importante di loke e comunidadnan cristian tawata lesa pa nan formacion y e sosten di nan bida den fe.