Catisashi pa Diadomingo: E mision, exigencia di catolicidad di Iglesia
849. E tarea misionero. "Iglesia, manda door di Dios pa hende pa ta ‘sacramento universal di salbacion' pa exigencia intimo di su mesun catolicidad, obedeciendo e tarea di su fundador, ta haci esfuerso pa anuncia e Evangelio na tur hende":321 "Bay anto y haci e hendenan den tur nacion mi discipel y batisa nan den nomber di Tata y di Yiu y di Spirito Santo y siña nan cumpli cu tur loke Mi manda boso. Y sa cu Mi ta cu boso tur dia te na fin di mundo" (Mt 28,19-20).
850. Origen y meta di mision. Mandato misionero di Señor tin finalmente su fuente den e amor eterno di Santisimo Trinidad:"Iglesia durante su biahe di peregrinacion aki na tera, ta di naturalesa misionero pasobra di acuerdo cu e plan di Tata e tin como su origen e mision di Yiu y Spirito Santo."322 E meta final di e mision no ta otro cu haci hende participa den comunion cu ta existi entre Tata y Yiu den Spirito di amor.323
851. Motibo di e mision. Di amor di Dios pa tur hende Iglesia a saca den tur epoca e obligacion y e vigor di su impulso misionero: "pasobra amor di Cristo ta pusha nos..." (2 Co 5,14).324 Di berdad, "Dios kier pa tur hende salba y yega na conocemento completo di e berdad" (1 Tim 2,4). Dios kier salbacion di tur pa medio di conocemento di berdad. Salbacion ta ser haya den e berdad. Esnan cu ta obedece e Spirito di Berdad, ya caba ta na caminda pa salbacion Pero Iglesia, na kende a confia e berdad aki, mester sali pa topa e deseo di esnan kende ta busc'e, pa ofrece nan e berdad. Pasobra e ta kere den e plan universal di salbacion, Iglesia mester ta misionero.
852. Caminda di mision. "Spirito Santo ta en berdad e protagonista di henter e mision eclesiastico."325 E ta esun cu ta guia Iglesia riba e camindanan di mision. E "ta continua y ta desaroya den curso di historia e mision di Cristo mes; kende a mand'e pa evangelisa pober... impulsa pa Spirito Santo e mester avansa riba mesun caminda riba cua Cristo a avansa; esey ta e caminda di pobresa, obediencia, sirbishi y sacrificio di su mes te na morto, di cua El a surgi victorioso pa su resurreccion".326 Ta asina e "sanger di martir ta simia di cristian".327
853. Pero den su peregrinacion, Iglesia a experencia tambe "ki distancia tin entre e mensahe cu e ta proclama y e debilidad humano di esnan na kende a confia e Evangelio".328 Solamente avansando riba caminda "di conversion y renovacion"329 y "riba e berea smal di Cruz"330 ta manera e Pueblo di Dios por extende e reino di Cristo.331 En berdad, "manera Cristo a realisa e obra di salbacion den pobresa y persecucion, Iglesia tambe ta yama pa sigui e mesun caminda pa comunica na hende e frutonan di salbacion".332
854. Pa su mesun mision, "Iglesia ta... avansa hunto cu henter humanidad y ta experimenta mesun suerte terenal cu mundo y ta existi manera yist y alma di sociedad humano, cu mester renoba y transforma den famia di Dios".333 E esfuerso misionero ta exigi anto pasenshi. E ta cuminsa cu e anuncio di Evangelio na e pueblonan y na e gruponan cu ainda no ta kere den Cristo;334 ta continua cu establece comunidad cristian, "señal di presencia di Dios den mundo",335 y den fundacion di Iglesia local;336 e ta implica un proceso di cultura pa asina encarna e Evangelio den e culturanan di e pueblonan,337 den e proceso aki no lo falta fracaso tampoco. "Si ta trata di hende, grupo y pueblo, solamente di un forma gradual Iglesia ta mishi cu nan y ta penetra nan y di e manera aki ta incorpora nan den e plenitud catolico."338
855. E mision di Iglesia ta reclama esfuerso pa yega na e unidad cristian.339 En berdad, "e division entre cristian ta un obstaculo pa Iglesia por yega na e plenitud di e catolisismo cu ta propio di dje; pa realisa esey cerca su yiunan kende pa medio di bautismo ta pertenece na dje, pero sinembargo ta separa di su comunion completo. Incluso esey ta hopi mas difícil pa Iglesia mes expresa e plenitud di e catolicidad bou tur su aspecto den e realidad actual di bida".340
856. E tarea misionero ta implica un
dialogo respetuoso cu esnan cu ainda no ta acepta e Evangelio.
341 E creyentenan por saca probecho pa nan mes di e dialogo aki, siñando di conoce miho "cuanto di berdad y di gracia tabatin caba entre e nacionnan, danki na un presencia secreto di Dios".
342 Si nan anuncia e Bon Noticia na esnan kende no conoce, ta pa consolida, completa y eleva e berdad y e bondad cu Dios a reparti entre hende y e pueblonan y pa purifica nan mes di e eror y di e malo "pa gloria di Dios, confucion di diabel y felicidad di hende".
343 BIDA MORAL Y TESTIMONIO MISIONERO
2044. E fieldad di esnan batisa ta un condicion primordial pa e anuncio di Evangelio y pa e mision di Iglesia den mundo. Pa manifesta dilanti hende su forsa di berdad y di radiacion, e mensahe di salbacion mester ta autentifica pa e testimonio di bida di cristian. "E mes testimonio di bida cristian y e bon obranan realisa cu spirito sobrenatural ta eficaz pa atrae hende na fe y na Dios."88
2045. Cristian, door cu nan ta miembro di e Curpa di cual e cabez ta Cristo,89 ta contribui na edificacion di Iglesia, pa medio di e constancia di su conviccionnan y su custumbernan. Iglesia ta aumenta, ta crece y ta desaroya pa santidad di su fielnan,90 "te ora cu nos yega e estado di hende perfecto, na e madurez di plenitud den Cristo" (Ef 4,13).
2046. Hibando un bida segun Cristo, e cristiannan ta haci binida di Reino di Dios mas lihe, "Reino di husticia, di berdad y di paz".91 Esaki no ta nifica cu nan ta bandona nan tareanan terenal, sino cu fiel na nan Maestro, nan ta cumpli cu nan cu rectitud, pasenshi y amor.
88 Concilio di Vaticano II, Apostolicum actuositatem,6
89 Cf Ef 1,22
90 Cf Concilio di Vaticano II, Lumen gentium,39
91 Misal Romano, Prefacio di Hesucristo Rey
321 Ibid.,1
322 Concilio di Vaticano II, Ad gentes,2
323 Cf HUAN PABLO II, enc.Redemptoris missio,11
324 Cf Concilio di Vaticano II, Apostolicum actuositatem,6; HUAN PABLO II, enc. Redemptoris missio,11
325 HUAN PABLO II, enc. Redemptorio missio,21
326 Concilio di Vaticano II, Ad. gentes,5
327 TERTULIANO, Apologeticus,50
328 Concilio di Vaticano II, Gaudium et spes,43,6
329 Concilio di Vaticano II, Lumen gentium,8; cf 15
330 Concilio di Vaticano II, Ad gentes,1
331 Cf HUAN PABLO II, enc. Redemptoris missio,12-20
332 Concilio di Vaticano II, Lumen gentium,8
333 Concilio di Vaticano II, Gaudium et spes,40,2
334 Cf HUAN PABLO II, enc. Redemptoris missio,42-47
335 Concilio di Vaticano II, Ad gentes,15
336 Cf HUAN PABLO II, enc. Redemptoris missio,48-49
337 Cf HUAN PABLO II, enc. Rdemptoris missio,52-54
338 Concilio di Vaticano II, Ad gentes,6
339 Cf HUAN PABLO II, enc. Resemptoris missio,50
340 Concilio di Vaticano II, Unitatis redintegratio,4
341 Cf HUAN PABLO II, enc. Redemptoris missio,55
342 Concilio di Vaticano II, Ad gentes,9
343 Concilio di Vaticano II, Ad gentes,9