Catisashi pa Diadomingo: "ACERC'E CU TUR CONFIANSA"
2777. Den Liturgia Romano ta invita asamblea Eucaristico pa resa na nos Tata celestial cu fervor di un yiu; e liturgianan di Oriente ta desaroya y uza expresion similar:"Tribi den pleno confiansa", "haci nos merecedo di...". For di mata na candela a sali un bos cu a bisa Moises:"No yega cerca; kita bo sapato for di bo pia, pasobra e luga caminda bo ta para ta tera sagrado" (Ex 3,5). Ta solamente Hesus por crusa entrada di santidad divino, pasobra "ora El a gana purificacion pa pica" (Hebr 1,3), El a hiba nos den presencia di Tata:"Ata mi aki, hunto cu e yiunan cu Dios a duna mi" (Hebr 2,13):
Si nos tabata consciente di nos posicion como catibo nos lo a hundi den tera y nos naturalesa terenal lo a disolve y bira tera, si autoridad di nos Tata mes y Spirito di Su Yiu no a dirigi nos obligatoriamente na e grito aki... ‘Abba, Tata!' (Rm 8,15)... Ta con un hende mortal por risca yama Dios como ‘Tata', "si no a anima su exsistencia di mas profundo pa poder di ariba?"20
2778. E poder aki di Spirito cu ta hiba nos na Oracion di Señor, ta expres'e den Liturgia di Oriente y di Occidente, pa medio di e expresion bunita y tipicamente cristian: parrhesia, simplesa sincero, confiansa di un yiu, seguridad glorioso, fervor humilde, e sintimento sigur di ta berdaderamente stima.21
"TATA!"
2779. Prome cu nos haci nos mes doño di e prome aclamacion di Oracion di Señor, humildemente nos mester purifica nos curason di cierto imagen falso "di e mundo aki". Humildad ta laga nos realisa cu "ningun hende conoce e Yiu fuera di E Tata y ningun hende conoce E Tata fuera di e Yiu of esun na kende e Yiu ta scoge di revel'e", pues, "na mucha chikito" (Mt 11,25-27). Purificacion di nos curason tin di haci cu imagen paternal y maternal, cu ta pertenece na nos historia personal y cultural y cu ta influencia nos relacion cu Dios. Dios nos Tata ta transcende tur categoria di mundo crea. Pa nos impone nos propio ideanan riba dje of contra, lo ta igual na construi idolo pa adora of basha abou. Resa na Tata ta nifica, drenta den Su misterio manera E ta y manera e Yiu a revel'E na nos.
Nunca a revela expresion Dios Tata na ningun hende. Ora Moises mes a puntra Dios ta kende E ta, el a tende un otro nomber. Nomber di Tata a keda revela na nos den su Yiu, ya cu e nomber "Yiu" ta implica e nomber nobo "Tata".22
2780. Nos por invoca Dios como "Tata" pasobra E ta revela na nos pa medio di su Yiu cu a bira hende y pasobra nos a siña conoc'E pa medio di Su Spirito. E relacion personal di e Yiu pa cu e Tata23 ta algo cu hende no por capta y cu ni poder angelical por mira ni djaleu. Y asina mes, Spirito di e Yiu ta ofrece nos un participacion den e mesun relacion ey pa nos cu ta kere cu Hesus ta e Cristo y cu nos a nace di Dios.24
2781. Ora nos resa na Tata, nos ta den comunion cu nE y cu Su Yiu, HesuCristo.25 E ora ey nos ta conocE y reconocE cu un sentido di maraviya eternamente nobo. E prome frase di e Nos Tata ta mas bien un bendicion di adoracion, cu e ta un suplica. Pasobra ta un gloria na Dios cu nos por reconocE como "Tata", e Dios berdadero. Nos ta yam'E danki pa a revela Su nomber na nos, pa e don di por kere esey y pa e hecho cu Su Presencia ta biba den nos.
2782. Nos por adora Tata, pasobra El a laga nos nace di nobo den Su bida door di adopta nos como Su yiunan den Su unico Yiu: pa medio di Bautismo, E ta incorpora nos den Curpa di Su Cristo; door di huntamento di su Spirito cu ta core for di cabes te na tur e otro partinan di e curpa, E ta haci di nos otro "cristonan":
En berdad Dios, cu a predestina nos como su yiunan adoptivo, a conforma nos na e Curpa glorioso di Cristo. Asina anto esnan cu bira participante den Cristo corectamente lo yama nan "cristonan".26
E hende nobo, renaci y rehabilita den su Dios pa medio di gracia, na prome luga ta bisa, "Tata!" pasobra awo el a cuminsa bira un yiu.27
2783. Asina Oracion di Señor ta revela nos na nos mes na mesun momento cu e ta revela Tata na nos:28
Ay hende, bo no a tribi hisa bo cara na cielo, bo a baha bo wowo pa tera y diripiente bo a ricibi gracia di Cristo: tur bo picanan a keda pordona. Di un sirbiente malicioso bo a cambia den un bon yiu... Pues fiha bo bista na Tata cu a crea bo mediante Bautismo, na Tata cu a salba bo pa medio di Su Yiu y bisa:"Nos Tata..." Pero no exigi ningun privilegio. E ta Tata, na un manera special, solamente di Cristo, pero e ta Tata universal di nos tur, pasobra mientras cu El a engendra solamente Cristo, El a crea nos. Anto bisa tambe pa medio di Su gracia, "Nos Tata", di manera cu bo por ta digno di ta Su yiu.29
2784. E don gratis di adopcion ta rekeri di nos parti, convertimento continuo y bida nobo. Resa na nos Tata, mester desaroya den nos dos caracteristica fundamental:
Na prome luga, deseo y boluntad pa bira manera E: crea segun Su imagen, ta rehabilita nos den Su semehansa pa medio di gracia; y nos mester responde na e gracia aki.
Nos mester corda... y sa cu ora nos yama Dios "Nos Tata" nos mester comporta nos mes como yiu di Dios.30
Bo no por yama Dios di tur bondad bo Tata si bo ta mantene un curason cruel y inhumano; pasobra e ora ey bo no tin e rastronan di misericordia di Tata celestial den bo mas.31
Continuamente nos mester fiha riba bunitesa di Tata y consecuentemente nos mester dorna nos propio alma.32
2785. Na di dos luga, un curason humilde y yen di confiansa cu ta laga nos "cambia y bira manera mucha" (Mt 18,3); pasobra ta na "mucha chikito" e Tata a revela su mes (Mt 11,25):
Ta un mirada na Dios y solamente nE, un gran candela di amor. Alma ta dirti y ta hundi den santo stimacion, ta papia cu Dios cu ternura, cu devocion special manera ta cu su propio Tata.33
Nos Tata: e nomber aki ta lanta amor den nos... y e speransa di logra haya loke nos ta pidi... Ta kico E lo no duna Su yiunan cu ta pidi, considerando cu ya El a duna nan e don di ta Su yiunan?34
"NOS" TATA
2786. "Nos" Tata ta referi na Dios. E adhetivo, cu nos ta uza, no ta expresa posesion, pero un relacion completamente nobo cu Dios.
2787. Ora nos bisa "nos" Tata, nos ta reconoce primeramente cu tur Su promesanan di amor anuncia pa e profetanan cu a keda cumpli den e Aliansa nobo y eterno den Cristo: nos a bira "Su" hendenan y di awo padilanti El a bira "nos" Dios. E relacion nobo aki ta e don completamente gratis di ta pertenece na otro: nos mester responde na "gracia y berdad" duna na nos den Hesu Cristo cu amor y fielded (Hu 1,17).
2788. Ya cu Oracion di Señor ta un oracion di Su pueblo na "fin di tempo", e "nos" aki tambe ta expresa nos speransa firme den promesa final di Dios: den Herusalem nobo E lo bisa e vencedor: "Ami lo ta su Dios y e lo ta Mi yiu" (Rev 21,7).
2789. Ora nos resa na "nos" Tata, nos ta papia personalmente cu Tata di nos Señor Hesucristo. Haciendo esey nos no ta dividi e divinidad, ya cu e Tata ta su "fuente y origen", pero mas bien nos ta reconoce cu e Yiu ta eternamente engendra pa medio di djE y e Spirito Santo ta origina di djE. Nos no ta bruha e Personanan, ya cu nos ta admiti cu nos comunion ta cu e Tata y Su Yiu, Hesu Cristo, den nan union cu Spirito Santo. Santa Trinidad ta uno den naturalesa y individibel. Ora nos resa na Tata, nos ta ador'E y glorific'E hunto cu Su Yiu y Spirito Santo.
2790. Gramaticalmente, "nos" ta defini un realidad comun na mas cu un persona. Tin solamente un Dios y E ta reconoci como Tata door di esnan cu pa medio di nan fe den Su unico Yiu, ta renace for di djE pa medio di awa y di Spirito.36 Iglesia ta comunion nobo di Dios y hende. Uni cu e unico Yiu, cu a bira "e prome naci entre hopi ruman," e ta den comunion cu e unico y mesun Tata den e unico y mesun Spirito Santo.37 Resando "nos" Tata, tur esnan batisa ta resa denter di e comunion aki: "E comunidad di esnan cu tabata di opinion cu hunto nan tabata un curason y un alma" (Ech 4,32).
2791. Pa e motibo aki, a pesar di division entre cristian, e oracion aki na "nos" Tata ta keda nos patrimonio comun y un apelacion urgente riba tur esnan batisa. Den comunion pa medio di fe den Cristo y pa medio di Bautismo, nan mester participa den oracion di Hesus pa unidad di Su discipelnan.38
2792. Finalmente, si nos resa na "Nos Tata" cu sinceridad, nos ta laga individualismo atras, pasobra e amor cu nos ta ricibi ta libra nos di dje. E "nos" na principio di Oracion di Señor, mescos cu e "nos" di e ultimo cuater peticionnan, no ta exclui ningun hende. Si nos kier papia sinceramente,39 nos division y antagonismo mester keda venci.
2793. Esnan batisa no por resa na "nos" Tata sin trece Su dilanti tur esnan pa kende El a entrega su Yiu stima. Amor di Dios no tin limite, nos oracion tampoco mester tin.40 Resamento di "nos" Tata ta habri pa nos dimension di Su amor revela den Cristo: resa cu y pa tur cu ainda no conocE, pa Cristo por "trece tur e yiunan di Dios hunto den union".41 E cuido di Dios pa tur hende y pa henter creacion a inspira tur esnan cu ta grandi den oracion; e mester extende nos oracion te na e pleno limite di amor ki ora cu nos tribi bisa "nos" Tata.
"CU TA NA CIELO"
2794. E expresion biblico aki no ta nifica un luga ("espacio"), pero un manera di ta; e no ta nifica cu Dios ta leu, sino mahestuoso. Nos Tata no ta "na un otro sitio". E ta transcende tur cos cu nos por imagina nos mes di Su santidad. Ta precisamente pasobra E ta tres biaha santo, cu e ta asina cerca di curason humilde y penitente.
"Nos Tata cu ta na cielo" comprendi corectamente ta nifica cu Dios ta den curason di esnan husto, mescos cu E ta den Su tempel santo. Na mes momento esey ta nifica cu esnan cu ta resa mester roga pa Esun na kende nan ta resa, biba den nan.42
"Cielo" tambe por ta esnan cu ta refleha imagen di mundo celestial y den kende Dios ta biba y ta permanece.43
2795. E simbolo di cielo ta referi nos di nobo na misterio di Aliansa cu nos ta biba aden ora nos ta resa na nos Tata. E ta den cielo, su residencia; e cas di Tata ta nos patria. Ta pica a manda nos den exilo for di e patria di Aliansa,44 pero conversion di curason ta haci posibel pa nos regresa cerca Tata, regresa den cielo.45
Pues den Cristo, cielo y tera a reconcilia,46 pasobra ta solamente e Yiu "a baha for di cielo" y ta haci posibel pa nos subi bay ey cu nE, pa medio di Su Cruz, Resureccion y Ascension.47
2796. Ora Iglesia ta resa "nos Tata cu ta na cielo," e ta profesa cu nos ta Pueblo di Dios, cu ya caba ta sinta "hunto cu nE den luga celestial den Cristo Hesus" (Ef 2,6) y "scondi cu Cristo den Dios" (Col 3,3), sinembargo na mes momento, "akibou en berdad nos ta suspira y anhela pa proteccion di cas celestial" (2 Cor 5,2).48
Cristian ta den carni, pero nan no ta biba di acuerdo cu carni. Nan ta hiba nan bida na tera, pero nan ta ciudadano di cielo.
49
20 SAN PEDRO CRISOSTOMO, Sermon 71,3: PL 52, 401CD
21 Cf Ef 3,12; Hebr 3,6; 4,16; 10,19; 1 Hu 2,28; 3,21; 5,14
22 TERTULIANO, De orat. 3: PL 1, 1155
23 Cf Hu 1,1
24 Cf 1 Hu 5,1
25 Cf 1 Hu 1,3
26 SAN CERILIO DI HERUSALEM, Catis. Mist. 3, 1: PG 33, 1088A
27 SAN CYPRIANO, De Dom. Orat. 9: PL 4, 525A
28 Cf GS 22,1
29 SAN AMBROSIO, De Sacr. 5, 4, 19: PL 16:450-451
30 SAN CYPRIANO, De Dom. Orat. 11:PL 4:526B
31 SAN HUAN CRISOSTOMO, De orat. Dom. 3: PG 51, 44
32 SAN GREGORIO DI NYSSA, De orat. Dom. 2: PG 44, 1148B
33 SAN HUAN CASSIANO, Coll. 9,18: PL 49, 788C
34 SAN AGUSTIN, De serm. Dom. In monte 2, 4, 16; PL 34, 1276
36 Cf 1 Hu 5,1; Hu 3,5
37 Cf Ef 4,4-6
38 Cf Concilio di Vaticano, UR 8,22
39 Cf Mt 5,23-24; 6,14-15
40 Cf Concilio di Vaticano, Na 5
41 Cf Hu 11,52
42 SAN AGUSTIN, De serm. Dom. In monte 2,5,18; PL 34,1277
43 SAN CERILIO DI HERUSALEM, Catis. Mist. 5:11: PG 33,1117
44 Cf Gen 3
45 Cf Yer 3,19-4: 1a; Lc 15,18, 21
46 Cf Is 45,8; Sal 85,12
47 Cf Hu 3,13; 12,32; 14,2-3; 16,28; 20:17; Ef 4:9-10; Hebr 1,3; 2,13
48 Cf Fil 3,20; Hebr 13,14
49 Ad Diognetum 5,8-9