Catisashi pa Diadomingo: DESTINO UNIVERSAL Y PROPIEDAD PRIVA DI BIEN
2402. Na cuminsamento Dios a confia na comunidad humano administracion comun di mundo y su recursonan natural pa conhuntamente cuid'e y pa somete esaki door di su trabou y pa gosa di su frutanan.140 E biennan di creacion ta destina pa henter humanidad. Pero no obstante, a parti e tera entre hende pa garantisa nan siguridad di existencia, pasobra e existencia aki ta expone na scarsedad y violencia ta menas'e. Ta p'esey tambe ta legalmente permiti pa adkeri propiedad pa garantisa libertad y dignidad di e personanan, pa yuda abastece cada persona den su propio necesidadnan y den necesidad di esnan pa kende e ta responsabel. Esaki mester haci posibel cu un solaridad natural ta crece entre hende.
2403. Derecho riba propiedad priva, obteni trahando of ricibi di otro hende door di herencia of donacion, di ningun manera ta anula e realidad cu originalmente a duna mundo na humanidad completo.
E destinacion universal di propiedad di mundo ta keda e norma principal, hasta si e promocion di bienestar general ta exigi pa respeta propiedad priva, tanto pa loke ta trata derecho di propiedad priva, como e uzo di dje.
2404. "Pa loke ta trata uzo di bien di mundo cu hende legitimamente tin: e no mag di considera esaki unicamente como su propiedad priva, pero mes tanto como propiedad comun, den e sentido aki cu e no por saca probecho pa solamente su so, pero pa otro hende tambe.141 Un hende cu tin un tereno como propiedad, ta como si fuera un administrado di Providencia, cu mester laga e tereno aki produci y laga otro tuma parti den esaki, na prome luga esnan cu ta mas cerca.
2405. Doño di produccion di mercancia, material of inmaterial, manera tereno of fabrica, experticio y talento artistico, mester maneha esaki cu cuidou di manera cu mas tanto hende cu ta posibel por probecha di ganashi. Esnan cu ta den posicion di mercancia di uzo y consumo mester haci uzo di nan cu moderacion y reserva e miho parti di dje pa e bishitante, enfermo of e pobernan.
2406. Autoridad civil tin derecho y deber pa regla, cu bista riba bienestar general, ehercemento legal di derecho di propiedad.142
RESPET DI PERSONA Y SU PROPIEDAD
2407. Respet pa dignidad humano ta pidi pa hende den asunto economico, observa virtud di moderacion pa limita di pega su mes na cos di mundo; virtud di husticia pa protega derecho di prohimo y pa dun'e loke ta coresponde na dje y solidaridad segun regla di oro y generosidad di Señor, kende, maske e tabata rico, a bira pober pa nos bienestar p'asina nos por bira rico door di Su pobresa (2 Co 8,9).
Respet pa bien di otro
2408. Di shete mandamento ta prohibi ladronicia, esey kiermen cohe ilegalmente propiedad di otro hende, contra boluntad rasonabel di e doño. No ta papia di ladronicia si hende por kere di tin permiso di e doño, of si su rechaso ta bay contra logica y contra destinacion universal di e biennan. Esaki ta e caso ora tin un catastrofe pisa y visibel unda unico recurso ta consisti di dispone y haci uzo di e biennan di tercera persona pa abastece di inmediato den necesidad cu ta urgente y esencial (cuminda, paña, alohamento).143
2409. Cada acto, door di cua hende inhustamente ta tuma of tene propiedad di otro ilegal den su poder ta bay contra e di shete mandamento, hasta maske esaki no ta den contradiccion cu e disposicionnan di ley civil. Manera por ehempel, keda deliberadamente cu mercancia presta of obheto perdi; estafa di negoshi;144 pagamento di salario cu no ta husto;145 aplica aumento di prijs unda hende ta specula riba ignorancia of situacion precario di prohimo.146 Moralmente no ta permiti tampoco: speculacion, door di cua hende ta eherce influencia riba fihamento di prijs di mercancia pa laga nan flucta artificialmente na desventaha di otro, cu e intencion pa saca probecho riba custia di otro; corupcion, door di cua hende ta cumpra opinion di esnan cu tin cu tuma decision segun ley; haci doño y uzo pa su mes di bienestar comun di un empresa, haci mal trabou, fraude fiscal; falsificacion di cheque y factura; gasto exagera y mal gastamento di placa. Intencionalmente causa daño na hende of propiedad publico ta en pugna cu ley moral y ta trece cu ne obligacion pa daño y perhuicio.
2410. Hende mester tene su mes na promesa y pa loke ta trata convenio hende mester ehecuta nan punctualmente, tanten cu convenio sera ta moralmente corecto. Gran parti di bida economico y social ta depende di balo di convenio entre persona fisico y persona huridico. Esaki ta e caso ora ta trata di convenio comercial di compra y benta y di contracto di huur y contracto di trabou. Nan mester sera y ehecuta cada contracto di buena fe.
2411. Contracto ta someti na husticia comutativo cu ta regla comercio di intercambio entre persona teniendo cuenta cu nan derecho. Husticia comutativo ta trece obligacion stricto cu ne, e ta pidi pa proteccion di derecho di propiedad, pagamento di debe, cumplimento di obligacion cu hende a tuma riba dje di su propio boluntad. Sin husticia comutativo no tin ningun otro forma di husticia. Hende ta distingui husticia comutativo for di husticia segun ley cual ta ocupa su mes cu loke e ciudadano rasonablemente debe comunidad y di husticia partitativo cu ta prescribi kico comunidad debe ciudadano proporcionalmente segun nan contribucion y necesidad.
2412. Pa drecha e inhusticia cometi, hende mester, segun husticia comutativo, paga e mercancia horta na e doño:
Hesus ta elogia Zacheo pa motibo di su intencion:"Si mi a chantagea un persona, mi ta debolbe cuater biaha mesun tanto" (Lc 19,8). Esun cu a haci su mes doño di pertenencia di otro hende, directo of indirecto, ta obliga di dun'e bek of si e pertenencia mes a perde, ta paga bek un pertenencia igual, den natura of placa; e mester paga tambe ganashi y beneficio cu e doño lo a ricibi di esaki na un manera legitimo. Esun cu a colabora na ki manera cu ta tambe na un ladronicia of a saca probecho conscientemente di esaki, tambe ta obliga di compensa proporcionalmente segun e parti y e bentaha cu e tabatin; esaki por ehempel ta e caso cerca esnan cu a orkestra un ladronicia, a yuda den esaki of a sconde e botin of a cumpr'e.
2413. Wega di suerte, (wega di carta etc.) of pustamento di placa riba su mes no ta en pugna cu husticia. Nan ta bira sinembargo moralmente inaceptabel ora nan ta kita for di hende loke nan tin mester pa proveni den su mes necesidad y esun di otro. Pasion pa wega por resulta den un vicio serio. Falsedad den wega di placa of engaño den wega ta un asunto serio, a menos cu e daño cu hende ta causa ta asina minimo cu esun cu a keda perhudica logicamente no por dun'e importancia.
2414. E di shete mandamento ta prohibi actividad of ta prohibi empresa cu pa cua motibo cu ta tambe, sea door di egoismo, ideologia, sed pa ganashi of dictatura di estado, ta conduci cu nan ta haci hende catibo, no ta reconoce nan dignidad personal, ta cumpra of ta bende nan y ta cambia nan como mercancia. E ta un pica contra dignidad di persona y contra su derechonan fundamental, cu ta rebaha hende na obheto di uzo of fuente di ganashi haciendo uzo di violencia. San Pablo ta pidi un shon cristian pa trata su catibo cristian "awo no mas como catibo... pero como un ruman stima... den Señor" (Flm 16).
Respet pa integridad di creacion.
2415. E di shete mandamento ta pidi pa respeta integridad di creacion. Bestia, mata y criatura sin alma tabata den pasado, awendia y den futuro di naturalesa destina pa bienestar comun di humanidad.147 Haciendo uzo di recurso di mineral, vegetal y animal di universo, hende no mag di separa nan di respet pa ley moral. E dominio di naturalesa cu tin alma y naturalesa sin alma cu Creador a confia na hende, no ta absoluto, ta limit'e, door di cuido p'e calidad di bida di prohimo, incluso di futuro generacion; nan ta exigi un respet religioso p'e integridad di creacion.148
2416. Animal ta criatura di Dios. Dios ta rondona nan cu su cuido eterno y amoroso.149 Puramente pa nan existencia nan ta bendiciona y alaba Señor.150 Hende tambe mester trata animal cu cariño. Aki hende por pensa riba sensibilidad cu cua santo manera Francisco di Assisi of Filipo Neri, a trata animal.
2417. Dios a confia cuido di animal na esnan cu El a crea segun su imagen.151 Pues ta permiti pa uza animal pa alimenta y bisti su mes. Hende mag di mansa nan di manera cu nan por yuda hende den su trabou y den su tempo liber. Si experimento medico y cientifico riba animal keda denter di limite rasonabel, nan ta moralmente aceptabel, pasobra nan ta contribui na cuido di hende y na salba bida di hende.
2418. Ta contra dignidad humano haci bestia sufri inutilmente y sacrifica nan bida sin necesidad. Tambe ta indigno inverti cantidad di placa den nan cu por a remedia miseria di hende. Por stima bestia; pero no por desvia debido afecto di ser humano na nan.
DOCTRINA SOCIAL DI IGLESIA
2419. "Revelacion cristian... ta percura pa nos haya un miho conocemento di ley di bida social. Iglesia ta haya den Evangelio e revelacion completo di berdad di hende. Ora Iglesia cumpli cu su mision pa proclama Evangelio, e ta duna testimonio den nomber di Cristo, dilanti di humanidad di su propio dignidad y di ta yama pa ta un comunidad di persona; e ta mustr ‘e riba exigencia di husticia y paz, cuanan ta cuadra cu sabiduria divino.
2420. Iglesia ta formula un opinion moral den asunto economico y social "ora derecho fundamental di persona of bienestar di alma ta exigi esaki".153 Iglesia tin riba tereno di moralidad un otro tarea cu autoridad politico Iglesia ta preocupa su mes cu aspecto temporal di bienestar general, te asina leu cu nan ta dirigi riba bondad Supremo, nos meta final. E ta haci esfuerso pa promove comportacion husto den relacion cu bienestar terenal y den relacion socio-economico.
2421. Doctrina social di Iglesia a desaroya den siglo 19, ora Evangelio a bin den contacto cu sociedad industrial moderno y relaciona cu esaki tambe cu structura nobo pa produccion di articulo di consumo, cu opinion nobo di sociedad, gobierno y autoridad y cu forma nobo di trabou y di propiedad. E desaroyo di doctrina di Iglesia riba tereno ecomomico y social ta muestra di e balor permanente di siñansa di Iglesia y tambe e berdadero nificacion di su tradicion cu ainda ta bibo y activo.154
2422. Enseñansa social di Iglesia ta contene un totalidad di doctrina cu ta haya claridad, segun cu Iglesia ta interpreta e acontecimentonan atrabes di historia cu ayudo di Spirito Santo y siguramente den luz di e Bon Noticia completo cu Cristo a anuncia.155 E siñansa aki ta bira mas aceptabel ainda pa hende di bon boluntad, segun cu esaki ta inspira conducta di fiel.
2423. Doctrina social di Iglesia ta ofrece principio pa reflexion; e ta bin cu criteria pa un opinion husto; e ta duna norma con pa actua:
Cada sistema unda relacion social lo ta completamente determina pa factor economico, ta contra naturalesa di persona humano y su hechonan.156
2424. Un teoria cu lo haci ganashi di e norma exclusivo y e meta final di actividad economico, ta moralmente inacceptabel. E ansha sin fin pa placa lo conduci sin duda na consecuencia desastroso. E ta un di e fuentenan di numeroso conflicto cu ta stroba e ordo social.157 Un sistema cu ta sacrifica derecho fundamental di hende y di grupo na produccion cu ta colectivamente organisa ta contra dignidad di hende.158 Cada proceder cu ta reduci e personanan na puro medio cu ta pa haci ganashi, ta haci hende catibo, ta conduci na adoracion di placa y ta contribui na plamamento di "ateismo". "Bo no por sirbi Dios y placa" (Mt 6,24; Lc 16,13).
2425. Iglesia a rechasa ideologia totalitario y ateista cu den tempo moderno tabata asocia cu "comunismo" of "socialismo". Ademas den practica el a rechasa tambe "capitalismo", individualismo y preferencia absoluto di economia di mercado liber riba labor.159 Ora hende regla e bida economico solamente segun un plan centralisa, nan ta stroba relacion social profundamente; ora nan regl'e solamente a base di mercado liber nan ta neglisha husticia social, pasobra "tin hopi necesidad humano cu mercado liber no por satisface".160 Nan mester recomenda un areglo pa economia di mercado y pa iniciativa economico cu ta responsabel segun un herarkia di balor cu ta husto y cu bista riba bienestar general.
2426. Desaroyo di actividad economico y crecemento di produccion ta destina pa satisface e necesidadnan di hende. Bida economico no tin solamente como meta pa laga mercancia cu nan a produci rende y laga ganashi of poder aumenta; na di prome luga nan mester sincronisa servicio na hende den su totalidad y na henter comunidad humano. Maske nan guia actividad economico segun su propio metodonan, e mester keda sinembargo denter di limite di ordo moral, conforme husticia social, pa coresponde na plan di Dios pa cu hende.161
2427. Labor humano ta bin directamente di hende cu ta crea segun imagen di Dios y kende a haya como tarea pa den union y pa beneficio mutuo somete mundo y asina continua cu trabou di creacion.162 Traha ta anto un deber:"Si un hende no ke traha, e lo no come tampoco" (2 Tess. 3,10).163 Trabou ta un honor na don di Creador y na talento cu hende a haya. E por tin tambe un balor di salbacion. Door di soporta molester di trabou164 den union cu Hesus, obrero di Nazaret y esun cu nan a crucifica riba Calvario, hende den cierto sentido ta colabora cu Yiu di Dios na trabou di salbacion. E ta demostra di ta un discipel di Cristo door di carga tur dia e Cruz ora di eherce e trabou cu nan a mand'e haci.165 Trabou por ta un medio pa santificacion y di animacion di realidad terenal den Spirito di Cristo.
2428. Trahando, hende ta desaroya un parti di habilidad cu el a ricibi di naturalesa. E balor primordial cu ta parti di trabou, ta den man di hende mes, kende ta haci trabou y pa ken e ta destina. Trabou ta pa hende y no hende pa trabou. Tur hende mester haya oportunidad pa adkeri door di su trabou e medionan pa gana su pan di cada dia y di su sernan stima y pa por ta den sirbishi di comunidad humano.166
2429. Tur hende tin derecho riba iniciativa economico y tur hende mester uza su talentonan legitimamente pa coopera na crea un prosperidad cu ta trece beneficio pa tur hende y pa cosecha fruta di su esfuersonan. E mester percura si pa acepta reglamento di gobierno legitimo manera a stipula esey cu bista riba bienestar general.167
2430. Den mundo economico tin diferente interes den wega cu hopi biaha ta contradeci otro. Esaki ta splica pakico ta surgi conflicto cu ta propio di mundo economico.168 Hende mester haci esfuerso pa resolve e conflictonan aki door di negoshamento cu ta respeta derecho y deber di cada coloborado social: nan ta entre otro esnan cu ta responsabel pa empresa, representante di trahado, por ehempel e sindicatonan y si ta necesario gobierno.
2431. Responsabilidad di estado. "Actividad economico y particularmente esun di economia di mercado liber no por desaroya unda tin falta di un institucion huridico y politico. E ta supone cu nan ta garantisa libertad individual y derecho di propiedad, sin papia mes ainda di un moneda stabil y di servicio publico eficiente. E tarea esencial di gobierno ta consisti di hustamente duna e garantia aki, pa asina cu esun cu ta traha, por gosa di fruta di su trabou y asina ta sinti su mes stimula pa haci su trabou eficientemente y honestamente. Gobierno tin obligacion di averigua si nan ta cumpli cu derecho humano den sector economico y percura pa su aplicacion; e prome responsabilidad pa esaki no ta tarea sinembargo di gobierno, pero di institucion, grupo y organisacion cu ta forma comunidad".169
2432. Esnan cu ta responsabel pa empresa ta carga e responsabilidad economico y ecologico pa comunidad cu nan actividadnan.170 Nan mester tene cuenta cu bienestar di persona y no solamente preocupa pa haci nan ganashi mas grandi. Claro nan mester haci ganashi tambe. Door di esey anto inversion ta bira posibel cu ta sigura futuro di empresa y ta garantisa oportunidad pa trabou.
2433. Nan mester ofrece tur hende oportunidad pa trabou y e chens pa eherce un profesion sin descriminacion inhusto, pues tanto pa homber como muhe, hende cu ta saludabel y hende cu tin desabilidad, autotono (autochtono) y stranhero.171 Segun circunstancia, comunidad di su banda mester yuda e ciudadanonan haya trabou y un empleo.172
2434. Fruta legitimo di trabou ta un salario husto. Ta un inhusticia serio pa nenga di paga salario of keda cu ne.173 Pa fiha e suma exacto di e salario mester tene cuenta cu tanto cada ken su necesidad como cu cada ken su contribucion. "Nan mester recompensa trabou di tal manera cu haciendo esey nan ta brinda hende e posibilidad pa expande su propio bida y esun di su famia na un manera digno den aspecto material, social, cultural y spiritual, unda nan mester tene cuenta cu cada un su funcion y productividad y tambe cu situacion di empresa y cu e bienestar general."174 Solamente e hecho cu e partinan a yega na un acuerdo no ta suficiente pa hustifica moralmente grandura di e salario.
2435. Welga ta moralmente permiti, te asina leu cu por considera nan como inevitabel, como medio necesario pa alcansa un bentaha proporcional. Nan ta moralmente inaceptabel, si nan ta bay compaña cu violencia of ora nan ta uza nan pa meta cu no directamente tin di haci cu condicion di trabou of cu ta contra bienestar general.
2436. Ta inhusto pa no pasa suma cu gobierno legitimo a stipula na instancia pa seguridad social.
Desempleo pa falta di trabou disponibel ta pa tur cu ta keda afecta door di esaki, casi semper ta mancha nan dignidad y un menasa pa ekilibrio den nan bida. Aparte di e perdida cu un hende ta sufri personalmente, ta surgi di esey tambe diferente peliger pa su famia.
175
140 Cf Gn 1,26-19
141 Concilio di Vaticano II, Gaudium et spes,69,1
142 Cf Concilio di Vaticano II, Gaudium et spes,71,4; HUAN PABLO II, enc. Sollicitudo rei socialis,42; ID.,enc. Centesimus annus,40; 48
143 Cf Concilio di Vaticano II, Gaudium et spes,69,1
144 Cf Dt 25,13-16
145 Cf Dt 24,14-15; St 5,4
146 Cf Am 8,4-6
147 Cf Gn 1,28-31
148 Cf HUAN PABLO II,enc. Centesimus annus,37-38
149 Cf Mt 6,26
150 Cf Dn 3,79-81
151 Cf Gn 2,19-20; 9,1-4
153 Ibid.,76,5
154 Cf HUAN PABLO II, enc. Centesimus annus,3
155 CF HUAN PABLO II, enc. Sollicitudo rei socialis,1; 41
156 Cf HUAN PABLO II, Centesimus annus,24
157 Cf Concilio di Vaticano II, Gaudium et spes,63,3; HUAN PABLO II, enc. Laborem exerceus,7; ID., enc. Centesimus annus,35
158 Cf Concilio di Vaticano II, Gaudium et spes,65
159 Cf HUAN PABLO II, enc. Centesimus annus,10; 13;44
160 HUAN PABLO II, enc. Centesimus annus,34
161 Cf Concilio di Vaticano II, Gaudium et spes,64
162 Cf Gn 1,28; Concilio di Vaticano II, Gaudium et spes,34; HUAN PABLO II, enc. Cenetsimus annus, 31
163 Cf 1 Ts 4,11
164 Cf Gn 3,14-19
165 Cf HUAN PABLO II, enc. Laborem exercens,27
166 Cf ibid.,6
167 Cf HUAN PABLO II, enc. Centesimus annus,32; 34
168 Cf HUAN PABLO II, enc. Laborem exercens,11
169 HUAN PABLO II, enc. Centesimus annus,48
170 Cf ibid.,37
171 Cf HUAN PABLO II, enc. Laborem exercens,19; 22-23
172 Cf HUAN PABLO II, enc. Centesimus annus,48
173 Cf Lv 19,13: Dt 24,14-15; St 5,4
174 Concilio di Vaticano II, Gaudium et spes,67,2
175 Cf HUAN PABLO II, enc. Laborem exercens,18