Catisashi pa Diadomingo: VIGILANCIA HUMILDE DI CURASON
Enfrentando dificultad den oracion
2729. Dificultad di custumber den oracion ta distraccion. E por afecta palabra y nan nificacion den oracion vocal; e por afecta mas profundamente, Esun na kende nos ta resa, den oracion vocal (liturgico of personal), den meditacion y oracion contemplativo. Si dicidi pa cuminsa combati e distraccion ta igual na cay den nan trampa, mientras tur loke ta necesario ta pa bolbe cerca nos curason: ya cu un distraccion ta bisa nos ta na kico nos ta mara y consenshi humilde dilanti di Señor lo mester spierta nos amor preferencial p'E y guia nos na manera decisivo pa ofrecE nos curason pa purificacion. Ta den esey e lucha ta sinta, scogencia na cua doño ta sirbi.16
2730. Tumando esaki den terminologia positivo, e lucha contra personalidad exigente y dominante ta rekeri vigilancia, curason senciyo. Ora Hesus ta insisti riba vigilancia, semper e ta referi esey na Su mes, na su binimento riba delaster dia y riba tur dia: awe. E bruidegom ta bini meyanochi; e luz cu no mester paga ta esun di fe:"Bo di, - mi curason ta repitie - :'Busca mi Cara" (Sal 27,8).
2731. Un otro dificultad, specialmente pa esnan cu sinceramente kier resa, ta secura. Indeferencia ta forma parti di oracion contemplativo ora e curason ta separa di Dios, sin ningun interes den pensamento, recuerdo of sintimento, ni pa esun spiritual. Esaki ta e momento di pleno fe cu ta pega fielmente na Hesus den Su agonia y den Su graf. "Si un pipita di trigo no cay na suela y muri, e ta keda su so; pero si e muri, e ta produci hopi fruta" (Hu 12,24). Si indiferencia ta debi na falta di rais, pasobra e palabra a cay riba tereno di baranca, e lucha ta rekeri conversion.17
Enfrentando tentacion den oracion
2732. E tentacion di mas comun y na mes momento esun mas scondi ta falta di fe. Esaki ta expresa su mes mas den nos preferencianan actual cu si nos declara formalmente di no ta creyente. Ora nos cuminsa resa, mil labor of preocupacion cu supuestamente ta di urgencia ta competi pa prioridad; atrobe, e ta e momento di berdad pa curason: kico ta su berdadero amor? Tin biaha nos ta acudi na Señor como ultimo refugio, pero nos ta kere berdaderamente cu E ta esaki? Tin biaha nos ta considera Señor como un aliado, pero nos curason ta keda arogante. En todo caso, nos falta di fe ta revela cu ainda nos no ta tuma parti den naturalesa di un curason humilde:"Sin Mi, boso no por haci nada" (Hu 15,5).
2733. Un otro tentacion, pa cual arogancia ta habri porta, ta acedia (falta di animo). Pa escritor spiritual esaki ta nifica un forma di depresion debi na custumber escetico sin disciplina, vigilancia cu ta mengua, curason indiferente. "En berdad spirito ta dispuesto, ma carni ta debil" (Mt 26,41). Mas grandi e haltura, mas duro e caida. Pa doloroso cu desanimacion por ta, e ta contrario na arogancia. Esnan humilde no ta keda asombra pa motibo di nan pena; e ta pone nan confia mas, pa wanta duro den consistencia.
CONFIANSA COMO YIU
2734. Ta test confiansa di yiu den tribulacion.18 Dificultad principal ta encera oracion di pidimento, sea ta pa bo mes of pa otro pa medio di intercesion. Tin hende te hasta ta stop di resa pasobra nan ta kere cu no ta scucha nan peticion. Aki mester haci dos pregunta: Di con nos ta kere cu no ta scucha nos peticion? Den ki forma ta scucha nos oracion y e ta "eficaz"?
Di con nos ta keha cu no ta scucha nos?
2735. Na prome luga e asunto aki mester duna nos asombro: ora nos alaba Dios of yam'E danki pa su bondad en general, nos no mester ta particularmente preocupa cu nos oracion ta aceptabel of no p'E. Di otro banda, nos ta exigi pa mira resultado di nos peticionnan. Kico ta imagen di Dios cu ta motiva nos pa resa: un instrumento pa uza? of e Tata di nos Señor Hesu Cristo?
2736. Nos ta convenci cu "nos no sa ta con nos mester resa" (Rom 8,26)? Nos ta pidi Dios pa "loke ta bon pa nos"? Nos Tata sa kico nos tin mester, prome cu nos pidiE,19 pero e ta warda riba nos peticion ya cu dignidad di Su yiunan ta sinta den nan libertad. Nos mester resa anto, cu Su Spirito di libertad, pa berdaderamente por compronde ta kico E kier.20
2737. "Bo ta pidi sin haya, pasobra bo ta pidi algo robes, pa malgast'e na bo pasionnan" (Hac 4,3).21 Si nos pidi cu curason dividi, nos ta "hende cu ta comete adulterio"22 y Dios no por contesta nos, pasobra E ta desea nos bienestar, nos bida. "Boso ta kere cu ta por nada Scritura ta bisa: ‘Dios kier e spirito cu El a pone den nos p'E so? " (Hac 4,5). Nos Dios ta "jaloers" pa nos ta señal di ki berdadero su amor ta. Si nos drenta den anhelo di Su Spirito, lo scucha nos:
No sea aflihi si bo no ricibi mesora for di Dios locual bo a pidiE; pasobra e ta desea di haci algo te hasta mas grandi pa bo, mientras bo ta colga na djE den oracion.23 Ta boluntad di Dios cu ta den oracion nos ta eherce nos deseo, cu nos lo por ricibi loke E ta dispuesto pa duna nos.24
Den ki sentido nos oracion ta eficaz?
2738. Revelacion di oracion den economia di salbacion ta siña nos cu fe ta basa riba funcion di Dios den historia. Ta lanta nos confiansa como yiu pa medio di Su obra supremo: Pasion y Resureccion di Su Yiu Homber. Oracion cristian ta cooperacion cu Su providencia, Su plan di amor pa ser humano.
2739. Segun San Pablo, e confiansa aki ta audaz,25 basa riba oracion di Spirito den nos y riba amor fiel di Tata cu a duna nos Su unico Yiu.26 Transformacion di curason cu ta resa ta e prome contesta riba nos peticion.
2740. Oracion di Hesus ta haci di oracion cristian un peticion eficaz. E ta su modelo, E ta resa den nos y cu nos. Considerando cu curason di Yiu ta rondia solamente loke ta agrada Tata, ta con anto oracion di yiu adoptivo por ta dirigi riba don en bes di riba e Dunado?
2741. Tambe Hesus ta resa pa nos - na nos luga y den nos nomber. A pone tur nos peticionnan hunto, den solamente un biaha pa nos tur, den Su yamada na E Cruz y scucha pa Tata den Resureccion di Hesus. Ta p'esey nunca e ta caba di intercede pa nos cerca Tata.27 Si nos oracion, den forma dicidido, ta uni cu esun di Hesus, den confiansa y audacia como yiu, nos lo haya tur loke nos pidi den Su nomber, te hasta mas cu cualkier cos particular: Spirito Santo mes, cu ta contene tur don.
PERSEVERANDO DEN AMOR
2742. "Resa constantemente" (1Ts 5,17), "tur ora y pa tur cos, yamando danki den nomber di Señor Hesucristo na Dios Tata" (Ef 5,20), San Pablo ta añadi:"Resa y pidi Dios su yudansa semper y na tur ocacion, guia pa Spirito Santo. Den esey keda alerta y resa cu perseverancia, suplicando pa henter e pueblo santo" (Ef 6,18). Pasobra "no a exigi di nos pa traha, pa tene vigilia y pa yuna constantemente, pero ta skirbi cu nos mester resa sin stop".28 E fervor incansabel aki solamente por origina for di amor. Contra nos cansancio y flohera, e lucha di oracion primordialmente ta consisti di amor humilde, fiel y perseverante. E amor aki ta habri nos curason pa tres hecho di fe encuanto oracion cu ta luminoso y cu ta duna bida:
2743. Semper ta posibel pa resa: ora di cristian ta esun di Cristo resucita cu ta semper cu nos (Mt 28,20) sin importa ki tempestad por bini.29 Nos ora ta den man di Dios:
Ta posibel pa ofrece oracion ferviente, te hasta ora ta cana den publico of ta cana solitario, of sinta den bo tienda... ora ta cumpra of ta bende... of te hasta ora ta cushina.30
2744. Oracion ta un necesidad vital. Prueba di lo contrario no ta menos convincente: si nos no laga Spirito guia nos, nos ta cay bek den sclavitud di pica.31 Con Spirito Santo por ta nos bida si nos curason ta leu for di djE?
Nada ta iguala oracion; pasobra loke ta imposibel, e ta haci posibel, loke ta dificil e ta laga bira facil... Pasobra ta imposibel, completamente imposibel, pa e persona cu ta resa cu fervor y cu ta invoca Dios sin stop haci pica.32
Esnan cu ta resa sigur ta salba; esnan cu no ta resa sigur ta perdi.33
2745. Oracion y bida cristian ta inseparabel, pasobra nan ta concerni mesun renunciacion, procedente di amor; mesun conformidad di yiu y di amor cu plan di amor di Tata; mesun union transformante den Spirito Santo cu ta haci nos mas y mas conforme na Cristo Hesus; mesun amor pa henter humanidad, amor cu cual Hesus ta stima nos. "Loke boso pidi Tata den mi nomber, E ta duna boso. Esaki anto ta loke Mi ta manda boso haci: stima otro." (Hu 15,16-17).
Esun cu "ta resa sin para" ta esun cu ta uni oracion cu obra y ta uni bon obra cu oracion. Ta solamente asina nos por considera principio di resamento sin para como realisabel.
34
16 Cf Mat 6,21, 24
17 Cf Lc 8,6.13
18 Cf Rm 5,3-5
19 Cf Mt 6,8
20 Cf Rm 8,27
21 Cf tur contexto: Hac 4:1-10; 1:5-8; 5:16
22 Cf Hac 4:4
23 Evagrius Ponticus De oratione 34: PG 79, 1173
24 San Agustin, Ep. 130, 8, 17:PL 33, 500
25 Cf Rm 10,12-13
26 Cf Rm 8,26-39
27 Cf Hebr 5,7; 7,25; 9,24
28 Evagrius Ponticus, Pract. 49: PG 40, 1245C
29 Cf Lc 8,24
30 SAN HUAN CRISOSTOMO, Ecloga de oratione 2: PG 63, 585A
31 Cf Gal 5:16-25
32 SAN HUAN CRISOSTOMO, De Anna 4,5: PG 54, 666
33 SAN ALFONSO LIGUORI, Del gran mezzo della preghiera
34 ORIGEN, De orat. 12:PG 11, 452C