Catisashi pa Diadomingo: IGLESIA, MAMA Y EDUCADO
2030. E cristian ta realisa su vocacion den Iglesia, den comunion cu tur cu a batisa. Di Iglesia e ta ricibi palabra di Dios, cu ta contene e siñansanan di "ley di Cristo" (Gal 6,2). Di Iglesia e ta ricibi e gracia di e sacramentonan cu ta dun'e apoyo riba su caminda. Di Iglesia e ta siña e ehempel di santidad; e ta reconoce den e Bienaventurada Birgen Maria e figura y e fuente di e santidad ey; e ta mir'e den testimonio autentico di esnan cu ta bib'e; e ta descubrie den e tradicion spiritual y den e storia largo di santo cu a bay su dilanti y cu liturgia ta celebra den e ritmo di e ciclo di santo.
2031. Bida moral ta un culto spiritual. Nos ta ofrece nos curpa "manera un hostia bibo, santo y agradabel na Dios" (Rm 12,1) den seno di Curpa di Cristo cu nos ta forma y den comunion cu e ofrenda di su Eucaristia. Den liturgia y den celebracion di sacramento, plegaria y siñansa ta bay hunto cu gracia di Cristo pa ilumina y alimenta e obra cristian. Bida moral, mescos tambe e conhunto di bida cristian, tin su fuente y su cumbre den sacrificio eucaristico.
BIDA MORAL Y MAGISTERIO DI IGLESIA
2032. Iglesia, "columna y fundeshi di e berdad" (1 Tm 3,15), a ricibi di apostel e mandato solemne di Cristo pa anuncia e berdad cu ta salba nos".73 "Ta competencia di Iglesia pa semper y tur caminda proclama principio moral, incluso loke ta referi na e orden social, asina tambe duna su huicio tocante cualkier asunto humano, segun midi cu derecho fundamental di e persona humano of salbacion di alma ta exigi."74
2033. E magisterio di pastor di Iglesia den materia moral ta eherce normalmente den catisashi y predicashi, cu yudansa di trabou di teologo y autor spiritual. Asina nan a transmitie di generacion pa generacion, bou guia y vigilancia di wardador, e "deposito" di moral cristian, cu ta consisti di un conhunto caracteristico di norma, mandamento y virtud, cu ta sali di fe den Cristo y nan ta haya bida pa medio di caridad. A tuma e catisashi aki tradicionalmente como base, hunto cu Credo y Nos Tata, e Decalogo cu ta duna principio di bida moral, valido pa tur hende.
2034. E Pontifice Romano y e obisponan, manera "maestro autentico, ya cu nan a haya autoridad di Cristo, ta predica pa pueblo e fe, den cual mester kere y cu mester pone den practica".75 E magisterio normal y universal di Papa y obispo den comunion cu ne ta siña fiel e berdad cu nan mester kere, e caridad cu nan mester practica, e bienaventuransa cu nan mester spera.
2035. E grado supremo di participacion na autoridad di Cristo ta sigura pa e carisma di infalibilidad. Esaki ta conta pa henter e deposito di revelacion divino;76 e ta conta tambe pa tur elemento di doctrina, incluso di moral, sin cual e berdadnan cu ta salba, di fe no por keda salbaguardia, exponi of observa.77
2036. E autoridad di e Magisterio ta extende su mes tambe na e reglanan specifico di ley natural, pasobra nan observacion, exigi pa Creador, ta necesario pa salbacion. Recordando e prescripcionnan di ley natural, e Magisterio di Iglesia ta eherce un parti esencial di su funcion profetico di anuncia na hende loke di berdad e ta y pa record'e loke e mester ta dilanti di Dios.78
2037. Ley di Dios, confia na Iglesia, fiel ta siña como caminda di bida y di berdad. Pesey fiel tin derecho79 pa haya instruccion tocante e reglanan divino cu ta salba y cu ta purifica huicio y cu gracia nan ta sana e rason humano herida. Nan tin e deber di observa e constitucionnan y e decretonan, haci conoci pa e autoridadnan legitimo di Iglesia. Aunke nan ta medio pa disciplina, e determinacionnan aki ta rekeri docilidad den caridad.
2038. Den e obra di enseñansa y di aplicacion di moral cristian, Iglesia tin mester di dedicacion di wardador, ciencia di teologo, e contribucion di tur cristian y di tur hende di bon boluntad. E fe y practica di Evangelio ta duna cada uno un experiencia di bida "den Cristo" cu ta ilumina y ta duna e capacidad pa stima e realidadnan divino y humano segun Spirito di Dios.80 Asina Spirito Santo por haci uzo di servicio di esnan mas humilde pa ilumina sabio y esnan cu ta pertenece den un posicion di mas halto.
2039. Mester eherce ministerio den spirito di servicio fraternal y di entrega na Iglesia den nomber di Señor.81 Na mes momento, consenshi di cada uno den su huicio moral tocante su actonan personal mester evita di sera su mes den un consideracion individual. Cu mayor empeño consenshi mester tene cuenta cu e bon pa tur hende, manera expresa den ley moral, natural y revela y consecuentemente den ley di Iglesia y den enseñansa autorisa di Magisterio tocante cuestion moral. Consenshi personal y rason no mester bay contra ley moral of di e Magisterio di Iglesia.
2040. Asina entre cristian por desaroya un
berdadero spirito di yiu pa cu Iglesia. Ta e desaroyo normal di gracia di bautismo, cu a laga nos nace den seno di Iglesia y cu a haci nos miembro di Curpa di Cristo. Den su solicitud como mama, Iglesia ta concede nos misericordia di Dios, cu ta bay mas leu cu un simpel pordon di nos picanan y e ta actua specialmente den e Sacramento di Reconciliacion. Como mama cu ta premira, e ta duna nos tambe cu abundancia dia tras dia den su liturgia, e alimento di Palabra y di Eucaristia di Señor.
73 SAN GREGORIO DI NISA, De vita Mosis: PG 44,300D
74 CDC,747,2
75 Concilio di Vaticano II, Lumen gentium,25
76 Ibid.
77 CONGREGACION PA DOCTRINA DI FE, decl. Mysterium Ecclesiae,3 AAS 65 (1973), 396-408
78 Cf Concilio di Vaticano II, Dignitatis humanae,14
79 Cf CDC,213
80 Cf 1 Co 2,10-15
81 Cf Rm 12,8.11