Beato Ciriaco-Elías di e Sagrada Famia Chavara
(1805 - 1871)
Riba 2 di januari di 1871, na drempel di su morto, e pader Ciriaco Elias di e sagrada Famia tawata bisa lo siguiente na e miembronan di e Instituto monastico cu e tawata dirigi: «Pa kico boso ta tristo? Tur hende, ken cu e ta, mester bai un dia of otro. Pa mi, e ora yega... For di dia cu mi mayornan piadoso a siña mi pa invoca cu frecuencia e santo nombernan di Hesus, Maria y Hose, nan patrocinio semper y na tur momento a proteha mi, y mi a sinti cu, pa e gracia di Dios, mi nunca a perde e gracia santificante cu mi a ricibi den e bautismo... Boso no mester ta tristo pa motibo di mi baimento. Somete boso mes completamente y di tur curazon na e sagrado boluntad di Dios. Pasobra Dios ta extremadamente y infinitamente misericordioso... Cu aki y den boso tur reina un caridad perfecto... Si boso actua di e forma ei, boso lo percura pa e gloria na Dios y e salbacion di e almanan, y nos congregacion lo sigui ta prosero».
E cristiannan di Santo Tomas
Beatifica riba 8 di februari di 1986 pa Papa Huan Pablo II, e monhe cu tawata papia den e terminonan ei a nace riba 8 di februari di 1805, den e pueblo di Kainagary, na Kerala (estado na suid di India). Su mayornan, Ciriaco y Maria Chavara, notabelnan di e region, tawata tin ya caba un yiu homber y cuatro yui muher. Según e costumbernan, e yiu mas chikito, cu ta ricibi e nomber di Ciriaco, mescos cu e tata, ta consagra na e Santisimo Birgen, riba 8 di september siguiente, festividad di e nacimento di Maria, den e santuario di Nos Señora di Vechour. Despues, e ta scibi: «Mi mama a siña mi algun oracionnan cu e tawata pone mi reza, na rudia banda di dje, den e prome oranan di anochi». Ciriaco ta ricibi, asina, un herencia cristian masha bieu, pues na India e cristianismo ta existi for di epoca di e apostelnan. Segun e tradicion, e apostel Santo Tomas a yega na Kerala, situa na e costa oeste di sur di India, rond di aña 52, evangelizando e region te cu su martirio, cu a tuma lugar dia 3 di juli di aña 72 na Mylpore, na e coste oriental. Su graf ta conserva na Madras, ciudad di e costa oriental. E comunidadnan cu el a funda te awe ainda ta florece, y su miembronan ta ricibi e nomber di «cristiannan di Santo Tomas».
Te na siglo XVI, tawata celebra e liturgia di e cristianonan ei segun e rito siromalabar, rito oriental procedente di Antiokia di Siria (situa actualmente na Turkia). E sede di Antiokia ta, hunto cu esun di Alejandria, un di e dos sedenan oriental di origen apostolico di cual e autoridad patriarcal a keda reconoci desde e Concilio di Nicea (325). Asina pues, e rito siromalabar ta masha bieu, y ta celebr'e den e lenga siriaco. E ta diferencia for di e rito latino den e forma di e ornamentonan liturgico, den e calendario festivo y den e ayunonan, den e ceremonianan sacramental, etc. Despues di su yegada na India den e siglo XVI, e portuguesnan a introduci e liturgia romano (yama latino) y, for di e tempo ei, tur dos rito, esun latino y esun siromalabar, ta coexisti.
Desde su infancia, Ciriaco Chavarra a demostra di ta hopi piadoso y extraordinariamente inteligente. Entre su 5 y 11 aña Ciriaco ta studia na e scol di su pueblo, y su gran aspiracion ta yuda e Misa (den rito siromalabar). Ora Ciriaco a cumpli diesun aña, y despues cu a comproba den dje cierto signonan di vocacion sacerdotal, e pader Tomas Palackal ta hib'e na e seminario di Pallipuram, di cual e ta e director; na 1817, e hoben ta ricibi e tonsuur clerical. Poco tempo despues su mayornan y su ruman homber ta fayece. Su tionan ta pretende cu e mester bandona e caminda di sacerdocio, pa e ocupa su mes di e interesnan di su famia, en especial di e yiu muher chikito di su ruman homber; pero, despues di cu el a atende cu e educacion di su subrina, Ciriaco ta continua su estudionan den e seminario. Un di su compañeronan ta scirbi lo siguiente acerca di dje: «Den e seminario, Ciriaco Chavara a hiba un bida ehemplar di amor na Dios, di dulzura, di humildad, di obediencia y di amor fraterno; tur su compañeronan tawata admir'e y aprecie». Algun tempo despues, e hoben seminarista ta bai, hunto cu dos compañero, na e seminario central di Verapoly, na unda e ta studia latin y portugues. Riba 29 di november di 1829 y cu 24 aña e ta keda ordena como presbitero, pa e vicario apostolico di e lugar, monseñor Stabilini.
Monhenan misionero
Pa e epoca ei, e pader Palackal y su amigo e pader Perukkara, sacerdotenan ilustre conoci pa nan talento y santidad, ta planea pa retira den soledad pa biba manera e ermitanan di antaño. Monseñor Stabilini ta tuma den serio e deseo ei y ta sugeri nan pa funda un instituto religioso indigena. Ciriaco, fascina tambe cu e mesun ideal, ta uni na nan despues di haña e aprobacion di e obispo. Riba 11 di mei di 1831, nan ta pone e prome piedra di e convento di Mannanam, dedica na San Hose. Otro sacerdotenan y seminaristanan tambe ta drenta den e comunidad ei cu ta creciendo, cual ta funda un seminario pega na e convento. Durante mei siglo, e seminario ei ta atende cu e necesidadnan di e siromalabarnan di Kerala, necesidadnan urgente cu anteriormente e formacion demasiado rudimentario di e presbiterionan tawata falta di duna hopi instrucción na e fielnan.
Na 1844, e pader Ciriaco ta haña e trabou di e vicario apostolico di Verapoly pa samina tur e clero di su rito pa loke ta trata e admisionnan na e ordenacionnan y e potestad di confesa y di predica. Den e mesun aña, den su anhelo pa publica obranan catolico den malayalam (lenga di e region), e ta laga fabrica un prensa di imprenta den palo, den actualidad for di uso pero conserva piadosamente, danki na cual nan a publica gran cantidad di obranan religioso, como tambe un revista mensual titula E flor di e Carmelo y un corant: E Deepika. Na 1846, despues di e morto di e dos prome fundadornan di e comunidad monastica ei, ta eligi pader Chavara como superior. Ademas di dedica un gran parti di su bida na e contemplacion, e padernan di e Instituto di Mannanam ta predica, según e deseonan di e vicario apostolico, retironan y misioneronan parokial. Cu e meta di realiza e apostolado ei, e mesun pader Ciriaco ta recore casi tur e iglesianan di Kerala. Di e forma ei, asociando bida apostolico y observacionnan monastica, e comunidad nobo ta constitui su mes den e centro bibo di edificacion di e pueblo cristian.
Algo radicalmente diferente
E importancia di e bida monastico pa cristianismo a keda marca for di algun aña pasa pa e president di e conferencia episcopal di India, monseñor Powathil, arzobispo siromalabar di Changannacheri, na Kerala: E generacion «postmoderna» ta busca e experiencia di Dios den e religionnan oriental y ta exigi un spiritualidad autentico. Den e transcurso di e prome milenio, e bida religioso tawata destina na duna un intenso experiencia di Dios y un testimonio na e mundo. Tawata un practica cu ta mantene e dimension contemplativo y escatologico di e bida cristian den e centro di e bida, y e monhe tawata un modelo privilegia di santidad. Nos mester restablece e monaquismo den e curazon di e Iglesia di awendia, tanto na oriente como occidente. E mundo «postmoderno» solamente por keda atrai pa algo cu ta resulta radicalmente diferente di e modelonan di consumo individualista y superficial. Lo unico cu por dun'e e autencidad berdadero y e comunion cu e ta busca desesperadamente ta e monaquismo cristian (cf. E Iglesia na peliger den mundo, no 87, 1995). «E monasterionan tawata y ta sigui ta, den e curazon di e Iglesia y di mundo, un signo importante di comunion, un lugar acogedor pa esnan cu ta busca Dios y e cosnan di spirito, scolnan di fe... pa e edificacion di e bida eclesial y di e mesun ciudad na tera, wardando riba lo celestial» (Huan Pablo II, Exhortacion apostolico Vita consecrata, 25 di mart di 1996, 6).
Danki na un bida spiritual intenso, e Instituto cu pader Ciriaco Elias ta dirigi ta desaroya te na e punto di lanta su mes den congregacion riba 8 di december di 1855, prome aniversario di e promulgacion di e dogma di e Inmaculada Concepcion: e «Congregacion di e Siervonan di Maria Inmaculada di e Monte Carmelo», mihor conoci bou di e nomber di «Carmelitanan pia abou di e di tres ordo». Den actualidad nan ta conta cu mas di 1.500 miembro, y na bida di pader Chavara, ademas di e convento di Mannanam, nan a funda otro shete casnan di e congregacion nobo.
Un obispo di su mesun rito
Pero un prueba ta yegando cerca. Na mei di 1861, e obispo Tomas Rocos ta yega na Kerala, manda pa e patriarca caldeo di Bagdad pa informa su mes di e situacion di e Iglesia catolico siromalabar den e region ei. Echo ta, cu te na final di siglo XVI, e «cristiannan di Santo Tomas» tawata goberna pa e preladonan caldeo di Mesopotamia. Pero for di e momento ei, bou e influencia di e portuguesnan, nan a keda remplaza pa e preladonan latino. Na 1858, ta surgi un conflicto entre e vicario apostolico nobo di rito latino di Kerala, monseñor Baccinelli, y algun sacerdotenan siromalabar. Mei mei di nan descontento, e ultimonan aki ta recurri na e patriarca caldeo Hose VI Audo, cu ta solicita permiso di Roma pa nombra un obispo pa e siromalabarnan. E contesta ta negativo, pero, a pesar di esei, e patriarca ta consagra na monseñor Roco, dirigiendo su mes despues na Roma cu e speranza di logra loke cu e kier.
Na su yegada na Kerala, monseñor Rocos ta esmera su mes den persuadi e catoliconan di e legitimidad di su mision, bisando cu e Santa Sede a encarga pa e patriarca caldeo cu lo consagra obispo den beneficio di su cristiannan. E pretensionnan falso ta haci e fielnan bacila y nan ta e causa di divisionnan grandi; den poco tempo, e mayoria di e parokianonan siromalabar ta separa nan mes di nan pastor legitimo di rito latino, e vicario apostolico di Verapoly, y nan ta alinea nan mes bou e autoridad di e obispo intruso. Den realidad, tanto e fielnan como e sacerdotenan ta sinti nan mes contento di por acohe un obispo di nan mesun rito, pues tawata algo cu nan tawata desea for di hopi tempo caba, pesei nan tawata para tras di e intencionnan y e procedimentonan di monseñor Rocos di lo mihor posibel. Di un total di 154 parokiano siromalabar, 86 a pone nan mes totalmente di parti di e obispo Rocos, y 30 parcialmente; solamente 38 a keda fiel na e autoridad legitimo.
E religiosonan di e pader Chavara, sin embargo, no ta uni nan mes na e principio ei di cisma. Monseñor Rocos ta purba e ora pa gana pader Ciriaco na su banda y ta propone e consagracion epsicopal, pero e monhe humilde ta contest'e cu e kier salba e alma y no wordo cumpra pa comberti su mes den obispo. Di su banda, e vicario apostolico di Verapoly ta apoya su mes den e pader Ciriaco y ta nombr'e vicario general pa e siromalabarnan, cu podernan extraordinario cu e meta di drecha e situacion ei. E ta pretende asta cu Roma lo nombr'e obispo, pero lo ta un deseo cu e no lo weita cumpli. E pader Chavara e ora ta manda un suplica na e Papa pa puntr'e ki caminda e siromalabarnan tin cu sigui. E contesta, fecha 5 di september di 1861, ta indica claramente cu e obispo Rocos a yega na Kerala a pesar di e prohibicion di e Sede Apostolico. Ademas, algun dia despues, e patriarca Hose VI Audo ta scirbi na su bes for di Roma na monseñor Rocos pidiendo e pa e bolbe na Mesopotamia.
E pader Chavara y e otro sacerdotenan di su congregacion ta pone e ora man na obra, bayendo di parokia pa parokia pa caba cu e pretensionnan di Rocos y hiba e fielnan di nobo na e obediencia di e pastor berdadero, e vicario apostolico di Verapoly. Despues, haciendo uso de su talento y de su tacto, e pader Ciriaco ta convence e obispo intruso pa bandona e region y e ta logra cu e vicario apostolico ta proporcion'e e placa necesario pa paga e biaje di regreso p'e. Di e forma ei, despues di un aña tur e parokianan disidente, ranca di e desastroso cisma ei, nan ta bolbe bou di e hurisdiccion di e obispo legitimo. Monseñor Rocos, cu a wordo excomulga pa e vicario apostolico, ta caba sometiendo su mes y ta haña pordon. Y e Papa Pio IX ta testimonia su enorme satisfaccion na pader Ciriaco Chavara, pa a spar e Iglesia e daño grave cu un cisma lo a nifica. Dor di trata di un «rechazo di e dependencia na e Sumo Pontifice o di e comunion cu e miembronan di e Iglesia sometidos na dje» (Catisashi di e Iglesia Catolico, 2089), ta parce cu e cisma ta, di berdad, segun Santo Tomas di Aquino, e mayor di e pecadonan contra e prohimo (Suma teológica, 2-2, 39, 2 ad 3).
Fidelidad absoluto
Si e pader Chavara tawata sa di hiba na bon fin e tarea ei di reconciliacion, asina mescos cu e otro obranan cu el a emprende (cuminsa), tawata ciertamente pa su prudencia, pa su cualidadnan excepcional y pa e eficacia di su elocuencia, pero prome cu tur cos pa su bida di santidad. Tur esnan cu a conoc'e a keda impresiona di su humildad profundo, di su caridad extraordinario y di su obediencia filial na su obispo, pues e ta absolutamente fiel na e Iglesia Catolico y na Papa. Cu awa na wowo, e tawata lamenta e pruebanan y e persecucionnan cu e Iglesia y e Santo Pader mester a wanta, y e tawata kima den e deseonan di haci resplandece tur caminda e luz di e Evangelio, pa asenta (haci firme) e Iglesia desea pa Hesucristo.
«Nos mision mas sagrado, e Papa Huan Pablo II tawata bisa e cristiannan di Kerala, ta construi e unico Iglesia desea pa Hesucristo den su oracion sacerdotal: Cu tur hende ta uno so (Jn 17, 21). Den su nificacion mas profundo, e unidad di e Iglesia ta un don di e Tata dor di Hesucristo, manantial y centro di e comunion eclesial. Ta Hesucristo ken ta haci nos forma parti di su Spirito, y e Spirito ta haci henter e curpa biba, e ta unific'e y ta impuls'e. E unidad interno aki ta splica maraviyosamente pa medio di e palabranan di e Apostol: un solo Curpa y un solo Spirito, manera ta e speranza na cua boso a wordo yama. Un solo Señor, un solo fe, un solo bautismo, un solo Dios y Tata di tur hende, cu ta riba tur hende, pa tur hende y den tur hende (Ef 4, 4-6). Ki palabranan esplendido y inspira!
E palabranan aki ta proclama, den realidad, e mision di e Iglesia den cada epoca y den cada generacion. Ta un deber sagrado di e Iglesia pa conserba e unidad ei, cu no ta otro cos cu e plenitud di e fidelidad na su Señor. Pesei mester forsa den restaura e unidad ei, einan na unda e tawata debilita of no cla. E unidad fundamental ei no ta exclui den absoluto e diversidad legitimo. Boso ta e testigonan bibo di e diversidad di e tradicionnan liturgico y spiritual y di e disciplina eclesiastico cu ta constitui e modelo di e presencia di e Iglesia na Kerala...
Rumannan, nos ta inclui den e plegaria aki di Hesus: Cu nos tur sea un. Pero Hesus no ta para einan y ta precisa e condicion di e unidad fundamental. Den su plegaria, e ta bisa nos: Y pesei mi ta consagra mi mes, pa cu nan tambe por ta consagra den e berdad (Jn 17, 19). E unidad ta basa den e berdad, den e berdad di e palabra cu El a revela na nos, den e berdad di cada palabra di e Tata...
Nos unidad ta e manantial di nos gozo y di nos paz. Di otro banda, e division y e discrepancianan, y specialmente e odio, ta opone nan mes completamente na e unidad; nan ta malo y nan ta relaciona cu e demonio. Den e mesun plegaria, Hesus a pidi Tata pa e preserva su discipulonan for di e Maligno (cf. Jn 17, 15). Asina pues, e oracion sacerdotal, cu ta exalta e beyeza di e unidad, ta comberti na mes momento den e yamada ardiente pa por supera tur loke ta opone na e unidad. Di e forma aki, e ta comberti den un oracion di reconciliacion» (Homilia di 7 di februari di 1986).
E pader Ciriaco ta traha cu tur su forsa den e apostolado di e misericordia y di e reconciliacion pa e salbacion eterno di e almanan. Den un obra titula Testament di un pader, e ta compone un sorto di canto cu ta exalta e amor fraterno. «E dianan den cua nos no a yuda niun hende no ta merece pa wordo considera entre e dianan util di nos bida». Ora cu malesanan contagioso ta tur caminda, hopi di e sacerdotenan ta keda leu, pero pader Ciriaco semper ta dispuesto pa bishita e enfermonan, pa reconforta nan y pa duna nan e sacramentonan. E ta funda tambe un casa pa acohe e pobernan y cuida nan, pero e ta practica specialmente tur e caridad cu esnan cu no ta haci mas cu manda insultonan y ingratitud pa cu n'e, sin tin rabia riba nan, sino stimando nan cu un amor masha special y considerando nan manera hacidonan di bon.
Una apariencia angelical
Na 1886, respondiendo na un deseo de su vicario apostlico, pader Chavara ta funda un convento di seournan carmelita di rito siromalabar, origen di e «Congregacion di e Mama di e Carmelo», cu ta conta actualmente cu mas di 4.500 religiosonan. Homber di accion y apostol incansabel, e pader Ciriaco ta prome cu tur cos un homber di oracion y yena di e Spirito Santo; e alimento di su bida ta e oracion, y su obranan imprimi o scirbi den manuscrito ta duna testimonio di su union cu Dios. Durante e momentonan di meditacion den comunidad, e ta asina den conbersacion cu Dios cu e ta lubida di cuant'or tin. Ademas di e rezamento diario di e Rosario, e ta exigi di su comunidad pa nan honra e heridanan sagrado di Nos Señor, e dolornan di María y e gozonan y e pruebanan di San Hose.
E mayor parti di su tempo liber e ta pas'e dilanti di e Santísimo Sacramento, y ora cu e ta den contemplacion intenso dilanti di e sagrario, su cara ta transfigura y e ta cobra un apariencia angelical. Den e casnan di su Instituto, e ta manda expone e Santísimo Sacramento durante e octava (fiesta religioso cu ta dura ocho dia) di Corpus. Na Kerala e ta institui e practica di e Cuarenta oranan den recuerdo di e aproximadamente cuarenta oranan cu a pasa entre e morto di Hesus na e Cruz y su Resurreccion; e practica aki ta consisti den e exposicion di e Santisimo Sacramento durante cuarenta oranan consecutivo. Ademas, algun predicacionnan special y un conhunto di ehercicionan piadoso ta predisponi na e fielnan pa adora cu mayor ferbor na nan dibino Maestro den e Sacramento di su amor, asina manera drecha e daño cometi contra djE. E practica aki, institui den 1534 pa un religioso capuchino como reaccion na e atakenan di protesta contra e Eucaristia, tin lugar normalmente durante e tres dianan anterior na Cuaresma, dianan di carnaval den cua e hendenan di mundo ta entrega nan mes hopi biaha na diversionnan culpable.
Danki na pader Chavara, e practica di e Cuarenta oranan ta extende na e iglesianan importante y na tur e comunidadnan religioso di e region. E enorme debocion di e pader Ciriaco Elias pa e Santisimo Sacramento ta haci cu nan ta yam'e «apostol di e Eucaristia». Pero, den su celo pa e culto dibino, e ta traha tambe den e revision di e bukinan liturgico, cu e meta di haña cierto uniformidad den e diferente iglesianan di rito siromalabar. E ta yega na scirbi su mes, y cu gran precision, e texto completo di un oficio di e breviario simplifica, di recitacion facil, destina na e sacerdotenan, y ta encarga su edicion, manera e rubricanan di e Misa mayor y di e visperanan solemne. Di e forma ei e ta contribui na rebaloriza e rito siromalabar, pero cu e aprobacion di Roma, pues, manera Pio XII ta scirbi, «e reglamentacion di e liturgia sagrado ta depende completamente di e apreciacion di e Sede Apostolica y di su boluntad». Efectivamente, «ya cu e liturgia sagrado ta realiza den e grado di mas halto pa e presbiteronan den nomber di e Iglesia, su ordenamiento, su reglamentacion y su forma no por stop di depende di e autoridad di e Iglesia» (Enciclica Mediator Dei, 20 di november di 1947).
Unidad y harmonia
For di 1869, e estado general di pader Ciriaco, cu ta sufri dolornan reumatico, ta deteriora di manera alarmante. Riba 2 di januari di 1871, riparando su mes cu su final ta yegando, e ta ricibi e ultimo sacramentonan. E miembronan di su comunidad, reuni cerca dje, ta pidie un ultimo bendicion, cu e ta concede na nan pronunciando cada palabra di forma trankilo y cla; despues di esei, nan ta recohe den oracion. Riba 3 di januari, pa mas o menos 7.30 ora, el a entrega su alma na Dios.
Cu motibo di e beatificacion di e pader Ciriaco Elias Chavara, Papa Huan Pablo II ta bisa: «No tawata tin niun causa apostolico mas precia pa e curazon di e homber di fe cu e unidad y e harmonia den e seno di e Iglesia. Tawata como si e tawata tin semper presente den e pensamento e oracion di Hesus den e anochi prome cu su sacrificio na e Cruz: Cu tur hende ta uno. Manera abo, Pader, den mi y ami den bo, cu nan tambe sea uno den nos (Jn 17, 21). E Iglesia ta recorda awe solemnemente, cu amor y gratitud, tur su esfuerzonan pa resisti na e amenazanan di desunion y pa anima e clero y na e fielnan pa mantene e unidad cu e Sede di San Pedro y e Iglesia universal. Mescos cu ta pasa den tur su otro empresanan, su exito den e tema ta debi sin niun duda na e intenso caridad y na e oracion cu a caracteriza su bida cotidiano, na su comunion intimo cu Hesucristo y na su amor pa e Iglesia como curpa visibel di Hesucristo na tera» (8 di februari di 1986).
Beato Ciriaco Elias di e Sagrada Famia, ta recorda nos cu e Iglesia Catolico ta un curpa, e curpa di Hesus visibel na tera, cu mester mantene den e unidad, aki na unda nos ta y den tur e lugarnan na unda nos por yega. Y nos ta pidi bo pa bo conduci nos na e unidad perfecto di e Shelo na tur nos sernan keri, bibo y difuntonan.