San Luis Alberto Hurtado Cruchaga S.J.
( 1901 - 1952 Chile )
Pa motibo di su biaha pa Chile na 1987, Papa Juan Pablo II a pronuncia e palabranan aki , yen di speransa: « Por ta, cu den nos dianan tambe, e Spirito lo lanta apostelnan di e estatura di e pader Hurtado, cual su sacrificio ta un testimonio di caridad y un muestra di e vitalidad di Iglesia? Nos ta sigur cu si; y nos ta pidi esei cu fe.»
Alberto Hurtado Cruchaga a nace na Viña del Mar, na Chile dia 22 di januari 1901. E tabatin solamente cuater aña, ora cu su tata a muri. Su mama Ana, a haya su mes den e angustia di a bira biuda repentinamente y a keda sin recurso. Hunto cu su yiunan el a bai busca su refugio na e capital Santiago. Como cu nan tabata carece di un domicilio, nan no tabatin otro modo, sino di pasa di cas pa cas serca famianan y dependiendo di nan asina yama bon boluntad. Alberto a sufri hopi bou di e situacion precario aki di famia. Apesar di tur cos el a sigui y a caba su scol y na maart 1918 el a cuminsa cu e studio di lei na e Universidad Catolico di Chile.
« Ken ta esnan cu mi mester stima?
E añanan dificil di su infancia a laga e hoben Alberto profundamente marca. P'esei ela dedica henter su bida na percura pa esnan cu ta infelis. E tabata dedica su mes na actividadnan apostolico, cu ta na nan fabor y ora cu ela compromete su mes cu politica, tabata pa percura pa nan haya ayudo social. E no por a soporta pa mira e dolo of cualkier necesidad, sin haci un intento pa remedia esaki: Mas despues lo e skirbi « Ken ta esnan cu mi mester stima? Tur mi rumannan di e humanidad. Mi ta sufri cu nan fracasonan, cu nan miseria y cu e oprecion di cual nan ta victima. Mi ta alegra mi, cu nan alegria. Den mi mente a cuminsa bini di nobo tur esnan, cu mi a topa riba mi caminda: Esnan di cual mi a haya bida, esnan cu a duna mi lus y pan, esnan cu mi a comparti un dak y pan cu nan. Esnan cu cual mi a lucha, cu mi a causa dolo, amargura y daño. Tur esnan cu mi a alivia, yuda y cu mi a saca di un dificultad. Esnan cu a opone mi, desprecia mi y cu a haci mi daño. Tur hende di mi cuidad, di mi pais y tur di henter mundo ta mi ruman. »
Tal amor pa e prohimo por ta posibel? Papa Benedicto XVI a contesta cu si:
« Ta di e manera aki por mira cu e amor pa prohimo ta posibel, den e sentido cu Beibel pa medio di Hesucristo ta anuncia. Hustamente e ta consisti di, cu den Dios y cu Dios mi ta stima tambe e persona, cu mi no ta gusta y cu tin biaha, ni sikiera mi ta conoce. Esei unicamente por cumpli cune, di momento cu tin un encuentro intimo cu Dios, esta un encuentro cu a comberti su mes den un comunion di boluntad y cu ta implica e sentimento. E ora ei mi ta siña mira e otro persona no solamente cu mi wowonan y mi sentimentonan, sino for di e perspectiva di Hesucristo. Su amigo ta mi amigo. Ademas di e aparencia exterior di e otro, mi ta descubri su anhelo interior pa un gesto di amor, di atencion. Mi por duna e otro mucho mas cu e cosnan externo cu ta necesario: Mi por ofrece un mirada di amor cu e mester.» (Enciclica Deus caritas est, 25 december 2005, n.18)
Alberto ta duda entre e orden sacerdotal, e bida consagra y matrimonio. Finalmente, despues di a resa intensamente, e ta ofrece su mes na Señor. « Mi ta entrega bo tur loke mi ta y cu mi ta posee, y mi ta desea di duna bo tur cos, sirbi bo di modo cu no tin ningun restriccion den henter mi don pa bo.» Siguientemente e ta opta pa e noviciado di e Compania di Hesus. Dia 7 di augustus 1923, e hoben ta gradua briyante pa e examen final na e Universidad Catolico y ta ricibi e titulo di abogado. Aunke cu e perspectiva di un futuro hopi prometedor ta presenta, toch e ta prefera di drenta den e noviciado di e jesuitanan. E ta skirbi un amigo lo siguiente: « Porfin mi ta un jesuita, mi ta asina hopi felis y contento, di un manera, cu lo mi no por ta mas aki na tera. Mi ta brota di alegria y mi no ta cansa di yama nos Señor danki pasobra cu ela trece mi den e berdadero paraiso aki, caminda un persona por dedica su mes na dje 24 ora pa dia.» El a ser manda Cordoba na Argentina, caminda el a profesa su promesa dia 15 augustus 1925. Su espirito di kier sirbi ta pone acepta e trabounan humilde di den cushina. E ta aplica e practica di birtudnan, special esun di respeta e prohimo. « No critica mi rumannan, yud'e cu su defectonan, papia di su cualidadnan. Papia semper bon di e superiornan y di nan disposicionnan. Ta asina cu honor ta e testimonio social cu a ser duna na e dignidad di hende, y cada hende tin un derecho natural pa honor di su nomber, su reputacion y su respet. Maldicion y calumnia ta afecta e birtudnan di husticia y di caridad.» (Catisashi di Iglesia Catolico, 2479)
Alberto Hurtado a ser manda Spaña pa studia teologia. Pero na 1931 e disturbionan politico ta castiga e Peninsula Iberica y ta oblig'e pa bai e Universidad di Leuven na Belgica. E testimonionan di su rumannan ta unanime y ora cu nan ta describie nan ta bisa cu e ta alegre, yen di animo den su trabou y servicial cu tur hende. 24 di augustus 1933 el a ser ordena pader. « Ya mi ta pader di Señor - el a skirbi un amigo - Dios a duna mi e gracia grandi di biba contento den tur e casnan cu mi a pasa y cu tur e compañeronan cu mi tabatin. Pero awor cu mi a ricibi e ordenacion sacerdotal pa semper, mi alegria a yega na su colmo. Awor ya mi no ta desea nada mas, cu no ta eherce mi minesterio sacerdotal, cu e mayor plenitud posibel di mi bida interior y di actividad exterior cu ta compatibel na esun prome menciona. E secreto di e adaptacion ei y di e exito, ta sinta den e debocion na Sagrado Curason di Hesus, loke ta e Amor di Nos Señor cu ta basha over. »
Di mas halto cu ta posibel
E ta traha den e fundacion di e Facultad di Teologia di e Universidad Catolico di Chile y tin gran dificultad pa haya profesor, buki y publicacionnan. Dia 10 di October 1935, e ta defende briyantemente su tesis doctoral den pedagogia na e Universidad di Leuven. Na mes tempo e ta bishita diferente centronan educativo den varios paisnan di Europa. Ora cu el a regresa na Santiago di Chile na februari 1936, pader Alberto a cuminsa duna les na e colegio di jesuitanan, mientras cu e tabata atrae y anima e hobennan pa realisa obranan social y di caridad. Durante e retironan spiritual segun Ehercicionan di San Ignacio, e ta stimula e almanan pa un encuentro cada bes mas profundo cu Señor, mientras cu e ta yuda nan pa seriamente busca boluntad di Dios; « E retironan ta pa e almanan cu kier subi, y mas ariba nan ta mas miho. Nan ta pa esnan cu a comprende kico ta significa Stima y cu cristianismo ta nifica amor y cu e gran mandamento por excelencia ta Amor »
Rondona dor di un gran fervor sacerdotal, pader Hurtado ta un modelo di e debocion eucaristico. Un misionero capuchino a yega di bisa, cu si tur pader ta celebra misa mescos cune, tur ta yega na bira santo. Na 1941 e ta ser nombra capelan di 4e Accion Catolico di hobennan pa e cuidad di Santiago y su apostolado na dicipelnan di e institutonan publico ta ser extende. Su tarea ta consisti den promove vocacionnan. Den un buki cu ta hiba como titulo - Chile ta un pais Catolico? - e ta habri wowonan di su contemporaneonan riba e situacion di su pais y ta señala e problema grandi di falta di vocacionnan sacerdotal. Sinembargo, e dificultad ei no a mengua e optimismo natural cu e tin y su exito pastoral lo bira pronto motibo pa combertie den e capelan nacional di hubentud catolico. Durante su biaha dor di e pais e ta predica tur parti na fabor di e retironan spiritual.
Como cu ta tene un gran procesion cu flambeu na honor di Santisima Birgen Maria den e seronan cu ta rondona Santiago, e pader Alberto ta stimula e miles di hobennan presente cu e siguiente palabranan: « Si Cristo mester bini atrobe, riba e anochi aki, mirando e scuridad di e cuidad, lo e tambe lo bisa cu caluroso emocion " esaki ta duna mi duele" y birando pa boso lo e bisa yen di un infinito ternura: " Bosonan ta e lus di mundo. Ta bosonan mester ilumina e tinieblanan. Bosonan kier colabora cumi? Bosonan kier ta mi apostelnan?" » E pader ta como un echo di San Ignacio, kende den su Ehercicionan spiritual, ta presta e palabranan di Hesus: " Mi boluntad ta pa conkista henter mundo y tur enemigo y asina drenta den e gloria di mi Tata. Asina ta, cu esun cu kier bini cumi mester traha cumi, pasobra es cu sigui mi den pena, lo sigui mi tambe den gloria" n.95
Y e pader Hurtado ta comenta poniendo e palabranan aki den boca di Hesus: « Mi mester di bo, mi no ta obliga bo, pero mi mester di bo pa realisa mi plannan di amor. Si bo no bini, anto un obra cu abo y solamente abo por realisa ta keda sin haci. Ningun hende por tuma e obra ei riba su mes, pasobra cada ken tin su parti di bondad pa realisa. Mira den mundo, e camponan ta birando seco, cuanto hamber y cuanto sed tin den mundo. Tin hamber pa Religion, Spirito, Confiansa y Sentido di bida. »
E exito di e fracasonan
Pero e shelo di pader Hurtado no ta comprendibel pa tur hende. Nan ta acus'e di falta di somete su mes na e herarkia. Tambe, di tin ideanan avansa y excesivo den circulonan social, tal manera un independencia exagera den relacion cu e otro ramonan di e Accion Catolico. E oposicion ta procede riba tur loke ta trata tocante e capelan general di hubentud. Na November 1944, pader Hurtado ta considera cu ta cumbiniele pa retira di su encargo di capelan di Accion Catolico, aunke cu esaki ta dun'e un sufrimento profundo. Sinembargo, e no ta perde di bista e fecundidad di e tristesa ei, segun cu e ta skirbi:
« Den e accion cristian tin e exito di e fracasonan y di e triunfonan cu ta bini despues! Den e mundo di cosnan invisibel ta asina, cu e loke pa su aparencia no ta sirbi, ta net e loke cu ta sirbi mas. Un fracaso completo, cu a ser acepta den bon, tin mas exito sobrenatural cu tur e triunfonan. P'esei sembra sin preocupa kico lo sali, pero no cansa di sembra. Duna gracia na Dios pa e frutanan apostolico di mi fracasonan. Ora cu Cristo a papia cu e hoben rico den Evangelio, el a fracasa, pero cuanto a scucha e les? Y delanti di Eucaristia nan ta hui ! Pero cuanto a bini despues? Bosonan lo mester traha, cu un afan cu ta parce morto, pero cuanto lo biba danki na bosonan? »
Riba un anochi friu y cu awasero tabata cai, e ta topa cu un homber pober, enfermo y temblando. E homber a aserc'e y bis'e cu e no tin ningun luga pa keda. E miseria ei a pone su curpa cohe ril. Algun dia despues el a duna un retiro na un grupo di hende muhe y el a papia di e miseria cu ta reina den Santiago: « Cristo ta pasa den nos cayanan den persona di tanto pober, enfermo y desolanan den nan tristo luganan. Cristo no tin cas! No ta nos ta esnan cu mester dun'e? Nos cu tin e suerte di tin un cas comfortabel, cuminda na abundancia, medionan pa educa y sigura e porvenir di nos yiunan? Loke cu un haci pa esnan mas chikito di mi rumannan ta pami el a hacie, Hesus a bisa (Mt 25,45) » Ora cu nan a sali di e retiro el a ricibi di nan tereno,prenda y varios cheque cu tabata pa e fundacion di "Cas di Cristo". Seis luna despues e arsobispo di Santiago a bendiciona su prome sede. Di e dia ei, e obra no a laga di expande y asina por a ricibi esnan mas pober, y crea un enorme sentimento di solaridad, cu lo pasa bai e frontera di e pais. Pero su obhetivo ta principalmente spiritual: « Un di e prome cualidadnan cu mester debolbe na nos hendenan ta un consenshi cu balor pa hendenan, pa nan dignidad como cuidadanonan, y mas ainda como yiu di Dios.»
E prome pobresa
E experencia di pader Hurtado ta ilustra perfectamente e intencionnan di Papa Benedicto XVI den su mensahe pa tempo di Cuaresma 2006: « Si mira e teribel desafionan di pobresa den gran parti di humanidad, anto e indiferencia di ta cera den un propio egoismo, ta forma un contraste intolerabel frente e "mirada" di Cristo. Awendia por constata, mira den e contexto di un interdependencia global, cu ningun proyecto, ni economico, social of politico por substitui e don di esun pa e otro den e manera di expresa e caridad. Esun cu actua segun e logica di Evangelio, ta biba e fe manera un amistad cu e Dios encarna y mescos cunE e ta preocupa su mes pa e necesidadnan material y spiritual di e prohimo. E ta mir'e manera un misterio, cu no por ser midi y cu ta digno di un atendimento y atencion infinito. E sabi cu esun cu no duna Dios, no a duna casi nada.. Asina e beata Teresa di Calcuta tabata bisa tur ora bai: " E prome pobresa di un pueblo ta ora cu e no conoce Cristo " P'esei ta necesario pa descubri Dios den e cara misericordioso di Cristo. Sin e perspectiva ei, no por construi un civilisacion riba basenan cu ta solido.»
Na aña 1947 pader Hurtado, hunto cu e hobennan di universidad a funda Accion Sindical y Economico Chileno (ASICH), como un sistema pa busca «e manera pa realisa un labor cu ta pone Iglesia presente riba tereno di trabou organisa.» E obra ta ofrece e obreronan un formacion cristian den e siñansa social di Iglesia, y ta defende e dignidad di e trabou humano, fuera di tur influencia ideologico. Tin hende - segun cu e pader ta skirbi - cu kier progresa, pero sin sinti e dolo. Nan no ta comprende loke ta nifica crece. Nan kier desaroya nan mes dor di cantamento, estudio y placer, pero no dor di pasa hamber, angustia, fracaso, esfuerso duro di cada dia, ni dor di aceptacion di e impotencia cu ta siña nos pa encomenda nos na e poder di Dios; ni dor di bandona e proyectonan personal, loke lo yuda nos reconoce esnan di Dios. Sufrimento ta benificioso pasobra e ta mustra mi, mi limitenan. E ta purificami y ta yudami pa tuma e crus di Cristo y e ta obligami pa bira mi cara pa Dios.» Den e contexto di e trabou aki, e pader ta dirigi su mes na Estadonan Uni di Merca y na Europa, y ta participa entre otro den e di 34 Siman Social na Paris y despues den e Siman Internacional di e jesuitanan na Versailles. Na Lion e ta participa den un congreso di teologiconan moralisto special riba tereno di Iglesia y Estado. Su opinion riba e movemento catolico social den Francia ta positivo, pero toch e ta mantene poco reserva principalmente en coneccion cu cierto intencionnan cu el a tende den e Congreso di Lion, caminda e ta constata « un afan execivo di renobacion y un tendencia pa lubida e balornan real di Iglesia, esta e vision tradicional. Un tendencia cu tin como consecuencia, pa laga Iglesia sin e dirigentenan autentico cristian, pero cu hombernan di mistico social, pero no cristian social.» Alabes e ta señala, « tin hopi deseo
pa sirbi Iglesia y un sacrificamento hopi real.» Pa motibo di un perigrinacion cu ela tene na Roma na luna di october e mesun aña, tanto e general di jesuitanan como Papa Pio XII
a anim'e den esaki.
Manera un baranca cu ta suta dor di olanan
Ora el a regresa na Chile, pader Hurtado a profundisa su proyecto di ASICH mas. El a pone como punta di salida, un fundamento solido den Cristo y den Iglesia. Na aña 1948 el a tene un conferencia hopi aprecia y cu a atrae na cierto ocasion mas cu cuater mil persona y cu despues a ser transmiti atrobe dor di radio. Sinembargo esei ta bira motibo di un mal comprondimento y di criticanan no hustifica. E mes a skirbi: « Ora un hende cuminsa biba pa Dios y ta haci sarificio y tin amor pa e otronan, anto e ora ei tur miseria ta toca na su porta.» Na mes momento e ta nota lo siguiente: « Cu frecuencia mi ta manera un baranca cu ta ser suta di tur banda dor di e olanan cu ta subi y no tin mas scapatorio cu no ta aya riba. Mi ta laga e olanan suta durante ora y dianan largo y mi no ta mira e horizonte. Solamente mi ta hisa cara wak ariba caminda cu Dios ta. O bida bendiciona, cu ta activo! Tur loke mi tin, mi ta consagra na Dios y tur cos mi ta entrega na hendenan! Nan exceso mes ta guia mi pa mi por topa y dirigi mi na Dios cu ta e unico salida posibel di mi preocupacionnan! E ta mi unico refugio!
Pero pader Hurtado , cu ta un santo, ta keda cu pia na suela, pasobra e sa cu hende encluyendo esnan den sirbishi di Dios, mester controla nan energia: « No tin nodi di exagera, ni di malgasta su energia cu di mas tension pa por conquista. E hende generoso tin e tendensia di kier cana masha pura, e kier renoba loke ta bon y caba cu inhusticia. Pero tocante e cosnan mes, cu mester por conta cune, esei nan e ta tuma nan mucho poco poco. Misticamente ta trata di cana den paso di Dios y di tuma un sitio husto den Dios su plan. Tur esfuerso cu ta bai mas leu ta inutil, mas ainda e ta dañino. E actividad ta remplasa e activismo cu ta subi manera champagne, cu ta pretende cosnan inalcansabel, cu ta kita tur bo tempo di por contempla y ta haci cu e hende no por ta doño di su mes bida.» E peliger di e di mas di accion ta e compensacion. Un hende cu ta cansa ta busca facilmente un compensacion. E momento ei ta bastante peligroso, como cu e ta perde parti di control riba su mes: e curpa ta cansa, e nervionan ta cansa y e boluntad ta basilando. Den e momentonan ei e locuranan di mas grandi ta posibel. Simpelmente bisa, e mester baha su ritmo, bolbe busca trankilidad serca amigonan cu ta bondadoso, resa e rosario sin pensa riba nada otro y bai drumi dushi cu e pensamento riba Dios.»
Na januari 1950 e episcopado di Bolivia ta invit'e pa particpa den e Prome Concentracion di e Apostolado Economico Social. E hubentud Agricola Catolico di Bolivia ta pidi pa su presencia na un asamblea nacional. « A yega e ora den cua nos accion economico-social mester stop di ta contento cu ripitacion di e consignanan general saca for di e enciclicanan di e Papanan. Mester propone solucionnan bon studia, pa por ser aplica nan inmediatamente den e campo economico y social.» Mientras tanto dor di su interes pa e apostolado intelectual e ta duna un impuhe pa funda e revista "Mensahe". E ta un revista cu ta desea mesora pa integra e formacion religioso, filosofico y social.
Un colaboracion di cada momento
Pero e profundidad di e alma di pader Hurtado ta ser revela special na ora di su ultimo enfermedad y di su morto. Sabiendo cu e ta sufri di cancer di pancreas e ta sclama;
« Con contento lo mi no ta! Con gradicido lo mi no ta na Dios! En bes di un morto violente e ta mandami un enfermedad largo pa mi por prepara mi mes. Di berdad Dios tabata pa mi un Tata cariñoso, e miho di tur tata.» For di hopi tempo nos santo a organisa un intenso actividad pa e momento aki. Bida a ser duna na hende pa e coopera cu Dios, pa realisa su plan: morto ta completa e plan aki, pues e ta entregamento di tur nos poder den man di nos Creador. Tur dia ta un preparacion pa mi morto, den cual mi ta entrega mi mes minut pa minut na obra di e cooperacion cu Dios ta pidimi, cumpliendo cu mi mision di loke Dios ta spera di mi y di loke e no por haci sin mi.» Pader Hurtado a desea semper e bida eterno, esta e encuentro definitivo cu Cristo. Asina e ta mustra den un di su paginanan; « Mi delanti ta keda eternidad, y ami ta manera un tiro den eternidad. Mi no ta pega mi mes na e bida aki, pero pa mira dor di tur cos e bida cu ta bini despues. Cu tur criatura por ta transparente y cu semper dor di nan mi weita Dios y eternidad. Na momento cu nan bira scur pa mi, mi ta laga bai y mi ta perdi. Despues di mi ta bini e eternidad. Mi ta bai aya y muy pronto! Ora pensa cu pronto e presente ta termina, anto uno por saca e conclusion : di ta un cuidadano di shelo y no di tera.» E imahen di un disparo, ademas di ta manifesta cu bida ta pasahero, ta insisti cu bida ta concentra solamente den un direccion: eternidad. E vision aki di eternidad ta esun cu a pone compronde profundamente su mes persona, e mundo y e hendenan, manera cu e ta skirbi; « Ta pa encera e hendenan den mi curason, tur pareu, pero cada uno na su luga. Manera cu ta normal tin diferente luga den curason di un hende y pa den Cristo traha e unidad di mi amornan.Tur eseinan na mi manera un ofrenda, un don cu ta pone e pecho reis: un movimento di Cristo den mi interior cu ta spiertami y ta biba mi caridad, un movimento di humanidad pa Cristo. Esei ta nifica, ser un sacerdotal!»
Dia 18 di augustus 1952 pader Hurtado ta muri manera un santo, rondona di su rumannan di e comunidad. Algun dia prome el a skirbi:« Na mi despedida mi ta bolbe bai serca mi Tata Dios. Permitimi confia boso un ultimo deseo: na momento cu e necesidad y dolonan di e pobernan aparece, weita con boso por yuda e Maestro.» E entiero na misa ta resulta den un berdadero triunfo. Ora cu nan a sali di e Iglesia, e nubianan a forma un crus na e shelo, un hecho impresionante cu a Sali den e corantnann di e tempo ei.
Dia 16 di October e pader Hurtado a ser beatifica dor di Papa Juan Pablo II y canonisado dia 23 di October 2005 pa Papa Benedicto XVI, cu a bisa lo siguiente: « E ministerio sacerdotal di san Alberto Hurtado ta distingui su mes dor di su sensibilidad y disponibilidad pa otronan, mientras cu e ta e berdadero imahen bibo di e Maestro amabel y humilde di curason. Na final di su dianan y apesar di e intenso dolonan dor di e enfermedad, e tabatin e forsa pa keda ripiti: « Mi ta contento, Señor, mi ta contento» y di e manera ei expresando e goso den cua semper el a biba»
Nos ta pidi na san Alberto Hurtado pa duna nos e gracia di e goso profundo cu e tabatin den e servicio na Dios y na su prohimo y dor di e sufrimentonan cu a impone e dedicacion ei.