CAPITULO CUATRO
DESAROYO DI E PUEBLONAN,
DERECHONAN Y DEBERNAN, AMBIENTE
43. «E Solidaridad universal, cu ta un hecho y un beneficio pa tur hende, tambe ta un deber» [105]. Den actualidad, hopi ta pretende di pensa cu no mester debe nada na niun hende, si no ta nan mes. Nan ta pensa cu nan ta solamente titularnan di derecho y cu frecuencia ta costa nan madura den nan responsabilidad pa loke cu ta trata e desaroyo integral propio y di otro hende. Pa esaki, ta importante pa pura lihe pa haña un reflexion nobo riba e debernan cu e derechonan ta presupone, y sin cual esakinan ta comberti den algo arbitrario [106]. Awendia nan ta duna un contradiccion profundo. Mientras cu di un banda, ta reclama loke cu nan ta kere di tin derecho ariba dje, di un caracter arbitrario y no necesario, cu e pretension cu e scrituranan publico ta reconoce nan y ta promove nan, di otro banda, ta existi derechonan elemental y fundamental cu ta ser ignora y viola den gran parti di humanidad [107]. Por mira hopi biaha un relacion entre e reclamacion di derechonan y loke cu lo ta di mas, y tambe cu lo ta viola ordo y vicio, den e sociedadnan rico, y di e falta alimento, awa di bebe, instruccion basico o cuido sanitario den cierto regionnan di mundo subdesaroya y tambe rond di e ciudadnan grandi. E relacion menciona ta consisti cu den e derechonan individual, desvincula di cierto debernan cu ta duna nan nificacion profundo, ta daña y ta habri caminda pa un spiral di exigencianan practicamente ilimita y cu falta di criterio. E dañamento di e derechonan ta conduci na lubidamento di e debernan. E debernan ta limita e derechonan, pasobra nan ta pone un circulo antropologico y etico den cual berdad nan ta hinca tambe e derechonan y asina nan ta laga di ta tuma parti. Pa e motibo aki, e debernan ta reforsa e derechonan y ta reclama pa defende nan y promove nan manera un compromiso na servicio di e bien. En cambio, si e derechonan di hende, ta stableci solamente den deliberacionnan di un asamblea di ciudadanonan, nan por ser cambia den cualkier momento y, consiguientemente, e ta keda den e conciencia comun e deber pa respeta nan y trata di obtene nan. E gobiernonan y e organismonan internacional e ora por lubida e obhevidad y e calidad di loke cu "no ta disponibel" di e derechonan. Ora cu esaki sosode, e berdadero desaroyo di e pueblonan ta core peliger [108]. Comportamentonan manera esaki ta compromete e autoridad moral di e organismonan internacional, prome cu tur cos den vista di e paisnan mas necesita di desaroyo. Di berdad cu esaki ta exigi cu e comunidad internacional ta asumi su deber pa yuda nan pa nan por ta «autornan di nan mesun destino» [109], kiermen, cu nan mester asumi debernan ora cu mester. Comparti e debernan cu otro ta movilisa mas, cu e mesun reclamacion di derechonan.
44. E trahamento di e derechonan y di e debernan pa loke ta trata e desaroyo, tambe mester tene na cuenta e problemanan relaciona cu e crecemento demografico. E ta un aspecto masha importante di e desaroyo berdadero, pasobra e ta afecta e balornan na cua no por renuncia di bida y di famia [110]. No ta corecto pa considera e aumento di poblacion como e prome causa di subdesaroyo, incluso for di e punto di bista economico: ta basta pa pensa, di un banda, den e notabel bahamento di e mortalidad infantil y e aumento di e edad media cu e paisnan economicamente desaroya ta produci y, di otro banda, e señalnan di crisis cu ta nota den e sociedadnan den cua ta constata un bahamento preocupante di e nacemento. Ta natural, cu mester sigui pone debido atencion na un proceso responsabel cu, pa loke cu por mira, e ta un contribucion efectivo pa e desaroyo humano integral. E Iglesia, cu ta interesa pa e berdadero desaroyo di e hende, ta recomenda esaki pa respeta e balornan humano tambe den e trabou di e sexualidad: esaki no por keda reduci solamente na un acto di placer y freimento, di e mesun forma cu e educacion sexual no por ser limita na un instruccion tecnico, cu e unico preocupacion di proteha e interesadonan contra e contagio eventual o di «riesgo» di procrea.
Esaki ta mescos cu empobrece y descuida e profundo nificacion di e sexualidad, cu mester ta den un cambio reconoci y asumi cu responsabilidad pa e persona y e comunidad. T'asina, cu e responsabilidad ta evita tanto cu ta considera e sexualidad manera un simpel fuente di placer, mescos cu ta regul'e cu politica di planificacion forsa di natalidad. Den tur dos casonan ta trata di concepcionnan y politica materialista, den cual e personanan ta caba padeciendo diferente formanan di violencia. Frente na tur e cosnan aki, e competencia primordial cu e famia tin den e tereno aki, mester wordo resalta [111], pa loke cu ta trata e Estado y su politicanan restrictivo, mescos cu un educacion adecua di e mayornan.
E apertura moralmente responsabel na e bida ta un rikesa social y economico. Nacionnan grandi por a sali for di e miseria, danki tambe na e gran number y na e capacidad di nan habitantenan. Contrario na esaki, nacionnan den un tempo floreciente ta pasa awor pa un fase di incertidumbre, y den algun caso di decadencia, precisamente pa causa di e indice di natalidad abou, un problema crucial pa e sociedadnan di mayor bienestar. E reducimento di e nacementonan, tin biaha bou di e asina yama «indice di reemplaso generacional», ta pone e sistemanan di asistencia social den crisis, nan ta aumenta e costonan, nan ta daña e reserva di spar y, consiguientemente, e recursonan financiero necesario pa inversionnan, nan ta reduci e disponibilidad di trahadonan cualifica y haci e reserva di «cerebronan» menos na esnan cu ta acudi na e necesidadnan di e nacion. Ademas, e famianan chikito, o masha chikito tin ora, ta core e riesgo di empobrece e relacionnan social y di no sigura formanan eficaz di solidaridad. Nan ta situacionnan cu ta presenta sintomanan di poco confiansa den futuro y di fatiga moral. P'esei e ta cambia den un necesidad social, y incluso economico, sigui propone na e generacionnan e bunitesa di e famia y di e matrimonio, su sintonia cu e exigencianan mas profundo di e curazon y di e dignidad di e persona. Den e perspectiva aki, e estadonan ta yama pa establece politicanan cu ta promove e centralidad y e integridad di e familia, funda den e matrimonio entre un homber y un muher, circulo importante y vital di e sociedad [112], cu tambe ta tuma e encargo di su problemanan economico y fiscal, pa loke cu ta trata su naturalesa relacional.
45. Pa duna un contesta na e exigencianan moral mas profundo di e persona, tin tambe efectonan beneficioso den e plan economico. T'asina, cu e economia tin necesidad di e etica pa su funcionamento corecto; no di un cualke etica, sino di un etica amiga di e persona. Awendia, ta papia hopi di etica den e campo economico, bancario y empresarial. Ta lanta centronan di estudio y programa formativo di business ethics; ta propaganda den mundo desaroya e sistema di certificacion etico, siguiendo e liña di e movimento di ideanan naci rond di e responsabilidad social di e empresa. E banconan ta propone cuentanan y fondonan di inversion yama «eticos». A desaroya un «finanza etico», special dor di e microcredito y, mas en general, e micro-financiamento. E procesonan menciona ta aprecia y ta merece un apoyo amplio. Su efectonan positivo ta yega incluso na e aerea menos desaroya di mundo. Sinembargo ta cumbini, traha riba un criterio di distincion balido, como cu ta nota un cierto abuso di e adhetivo «etico» cu, usa na un manera generico, e por cubri tambe contenidonan completamente diferente, te hasta na e punto di laga pasa pa etico decisionnan y opcionnan contrario na e husticia y e berdadero bon di e hende.
T'asina cu mucho ta depende di e sistema moral di referencia. Riba e aspecto aki, e doctrina social di e Iglesia ta ofrece un aporte specifica, cu ta funda den e creacion di e hende «na e imagen di Dios» (Gn 1,27), algo cu ta regla e inviolabel dignidad di e persona humano, manera e balor trascendente di e normanan di moral natural. Un etica economico cu no tin e dos pilarnan aki ta core e peliger di inevitabelmente perde su propio nificacion y ta bira un instrument; mas concretamente, e lo core e riesgo di bira mescos cu e sistemanan economico-financiero cu ta existi caba, na lugar di coregi nan mal funcionamento. Ademas, incluso e por hustifica e financiacion di proyectonan no etico. Ta necesario, anto, no sconde tras di e palabra «etica» na un manera ideologicamente discriminatorio, dunando di comprende cu e iniciativanan cu no ta carga formalmente e cualificacion ei lo no ta etico. Ta cumbini pa haci un esfuerso -e observacon aki ta esencial- no solamente pa lanta sectornan o segmentonan «etico» di e economia o di e finanzas, sino pa cu tur e economia y e finanza lo por ta etico y lo no ta pa un etiketa di parti pafor, sino dor di e respet pa e exigencianan mara na su propio naturalesa. Respecto esaki, e doctrina social di e Iglesia ta papia cla, recordando cu e economia, den tur su ramonan, ta un sector di e actividad humano [113].
46. Pa loke cu ta trata e tema di e relacion entre empresa y etica, mescos cu e evolucion cu ta hañando e sistema productivo, ta parce cu e distincion te awor aki mas plama bou empresanan destina na beneficio (profit) y organizacionnan sin ganashi (non profit) ya no ta refleha plenamente e realidad, ni ta capaz di orienta e futuro eficazmente. Den e ultimo decenionan, poco poco a surgi un zona amplio intermedio entre e dos tiponan di empresanan. E zona intermedio ei ta traha pa empresanan tradicional cu, sin embargo, nan ta suscribi pactonan di yudansa na paisnan atrasa; pa fundacionnan cu ta promove pa empresanan concreto; pa gruponan di empresanan cu tin e caracteristica di utilidad social; dor di e mundo amplio di agentenan di e asina yama economia civil y di participacion. Aki no ta trata di un «di tres sector», sino di un realidad amplio forma, cu ta implica e sector priva y publico y cu no ta exclui e beneficio, pero cu ta considera instrumento pa proposito humano y social. Cu e empresanan aki ta distribui mas o menos e beneficionan, o cu nan ta adopta un ke otro configuracion huridico traha segun lei, ta secundario pa loke cu ta trata su disponibilidad pa traha e ganashi como un instrumento pa yega na obhetivonan di humanizacion di e mercado y di e sociedad. Ta deseabel cu e formanan nobo aki di empresa ta haña den tur paisnan un leishi huridico y fiscal adecua. Asina, sin kita importancia y utilidad economico y social na e formanan tradicional di empresanan, ta haci e sistema evoluciona rumbo pa un aumento mas cla y completo di e debernan di banda di e agentenan economico. Y no solamente esaki. E mesun pluralidad di e formanan institucional di empresa ta loke cu ta promove un mercado mas civico y na mesun tempo mas competitivo.
47. E elevacion di e diferente sorto di empresanan y, particularmente, di esnan cu ta capaz di inventa e beneficio como un instrumento pa haña formanan pa haci e mercado y e sociedad mas agradabel, mester haci esaki tambe den paisnan exclui o na rand di e circuitonan di e economia global, na unda mester ta masha importante pa traha cu proyectonan cu mester subsidio cu ta diseña segun loke cu ta cumbini y su necesidad, cu tin custumber di promove e derechonan, pero semper teniendo na cuenta cu tambe mester asumi e responsabilidadnan corespondiente. Den e iniciativanan pa e desaroyo mester keda na salvo e principio di e centralidad di e persona humano, kende ta esun cu mester asumi na prome lugar e deber di e desaroyo. Loke cu principalmente ta di interes ta e mehoracion di e condicionnan di bida di e personanan concreto di un cierto region, pa nan por satisface cierto debernan cu e Estado no ta permiti nan mira actualmente. E preocupacion nunca por ta un señal abstracto. E programanan di desaroyo, pa por adapta na e situacionnan concreto, mester ta flexibel; y e personanan cu ta beneficia mester implica directamente den nan planificacion y conberti nan mes den protagonistanan di nan realizacion. Tambe ta necesario pa aplica e criterionan di progreso y compañamento -inclui e siguimento di resultadonan-, pasobra no tin formula universalmente balido. Hopi cos ta depende di e e gestion concreto di e intervencionnan. «Constructornan di nan propio desaroyo, e pueblonan ta e prome nan responsabel di esaki. Pero nan lo no por realiza nan so» [114]. Awendia, cu e consolidacion di e proceso di integracion progresivo di e planeta, e exhortacion di Pablo VI tin mas balides ainda. E trabou di inclusion no tin nada di mecanico. Mester ahusta e solucionnan na e bida di e pueblonan y di e personanan concreto, basando den un balorizacion cu prudencia di cada situacion. Banda di e macro proyectonan ta necesario e micro proyectonan y, prome cu tur cos, ta necesario e movilizacion efectivo di tur e hendenan di e sociedad civil, tanto di e personanan huridico como e otronan.
E cooperacion internacional tin mester di personanan cu ta participa den e proceso di desaroyo economico humano, pa medio di e solidaridad di e presencia, e compañamento, e formacion y e respet. For di e punta di bista aki, e propio organismonan internacional, mester puntra nan mes tocante e eficacia real di nan aparatonan burocratico y administrativo, hopi biaha demasiado costoso. Tin biaha, esun cu ta ricibi e yudansa ta resulta util pa esun cu ta yudando e, y asina e pobernan ta sirbi pa mantene puestonan burocratico costoso, cu ta destina na nan mesun conservacion un porcentahe demasiado halto for di recursonan aki, cu lo mester ta destina pa e desaroyo. Referente na esaki, ta na su lugar cu e circuitonan internacional y e organizacionnan no gubernamental ta haci nan esfuerso pa un transparencia total, informando e donantenan y e opinion publico riba e parti di e fondonan ricibi cu nan ta destina pa programanan di cooperacion, riba e berdadero contenido di e programanan menciona y, en fin, riba e distribuimento di e gastonan di e institucion mes.
48. E tema di e desaroyo tambe ta masha uni awendia cu e debernan cu ta nace di e relacion di e hende cu e ambiente natural. Esaki ta un don di Dios pa tur hende, y su uso ta representa pa nos un responsabilidad pa e pobernan, e generacionnan di futuro y tur humanidad. Ora cu ta considera e naturalesa, y na prome lugar e ser humano, fruta di e destino o di e desaroyo, ta haci e sentido di e responsabilidad di e consenshi mas limita. E creyente ta reconoce den e naturalesa e resultado maraviyoso di e intervencion creador di Dios, cu e hende por utilisa responsabelmente pa satisface su necesidadnan legitimo -material y inmaterial- respetando e ekilibrio propio di e creacion mes. Si e vision aki bira menos, ta caba pa considera cu e naturalesa ta un tabu cu no por mishi cu ne o, contrario na esaki, por haci abuso di dje. Tur dos postura no ta conforme na e vision cristian di e naturalesa. Fruto di e creacion di Dios.
E naturalesa ta expresion di un proyecto di amor y di berdad. E ta bai nos dilanti y Dios a duna nos e como esfera di influencia di bida. E ta papia cu nos di e Creador (cf. Rm 1,20) y di su amor pa e humanidad. Su destino ta pa topa na final di tempo cu e «plenitud» den Cristo cf. Ef 1,9-10; Col 1,19-20). Mientras tanto, e tambe ta un «vocacion» [115]. E naturalesa ta di nos banda, no como un «monton di cos sushi tira pa nan cuenta», [116] sino como un don di e Creador cu a diseña su structuranan esencial cu e hende por descubri e orientacionnan cu e mester sigui pa «ward'e y cultiv'e» (cf. Gn 2,15). Pero mester pone enfasis cu e ta contrario na e berdadero desaroyo pa considera e naturalesa di ta mas importante cu e hende mes. E forma di pensa aki ta hiba nos na actitudnan neopagano o di un panteismo nobo: e salbacion di e hende no por bin unicamente di e naturalesa, compronde den sentido puramente naturalista. Di otro banda, tambe ta necesario pa refuta e posicion contrario, cu ta contempla su completo tecnificacion, pasobra e ambiente natural no ta solamente materia disponibel na nos gusto sino obra admirabel di nos Creador y cu ta encera un «gramatica» cu ta indica finalidad y criterionan pa un uso inteligente, no instrumental y arbitrario. Awendia, hopi prehuicionan pa cu desaroyo ta sali di e realidad di e maneranan bruha di pensa aki. Reduci e naturalesa completamente na un serie di simpel datonan cu ta berdad, ta caba pa ta fuente di violencia pa e ambiente, provocando ademas conductanan cu no ta respeta e naturalesa di e hende mes. Esaki, ora cu e no ta traha di un solo materia, sino di spirito, y mientras tanto rico na nificacionnan y finnan trascendente, e tin un caracter normativo incluso pa e cultura. E hende ta interpreta y modela e ambiente natural dor di e cultura, loke cu ta orienta na su turno pa e libertad responsabel, atento na e dictamennan di e lei moral. Mientras tanto, e proyectonan pa un desaroyo humano integral no por ignora e generacionnan cu ta sigui, sino cu mester caracteriza nan pa e solidaridad y e husticia intergeneracional, teniendo na cuenta multiple aspectonan, manera e ecologico, e huridico, e economico, e politico y e cultural [117].
49. Awendia, e cuestionnan relaciona cu e cuido y cu ta salvaguardia e ambiente mester tene debidamente cuenta cu e problemanan energetico. T'asina cu, algun estado, gruponan di poder y empresanan di recursonan energetico, cu no por renoba, ta forma un gran obstaculo pa e desaroyo di e paisnan pober. Esakinan no tin medionan economico ni pa yega na e fuentenan di energia no renovabel cu ta existi caba ni pa financia e buscamento di fuentenan nobo y alternativanan. E acumulacion di recursonan natural, cu den hopi casonan ta estableci precisamente den paisnan pober, ta causa explotacion y hopi biaha conflictonan entre e nacionnan y den interior di nan paisnan. E conflictonan menciona ta produci cu frecuencia precisamente den e teritorio di e paisnan ei, cu consecuencianan grave di morto, destruccion y masha hopi degradacion tambe. E comunidad internacional tin e deber imprescindibel di haña e formanan institucional pa duna ordo pa probecha e recursonan no renovabel, cu e participacion tambe di e paisnan pober, y asina hunto planifica e futuro.
Den e sentido aki, tin tambe un necesidad moral urgente di un solidaridad renoba, specialmente den e relacionnan entre paisnan ariba caminda di desaroyo y paisnan altamente industrializa [118]. E sociedadnan tecnologicamente avansa por y mester mengua e propio gastonan di energia, pa motibo cu e actividadnan manufacturero ta evoluciona bon, pasobra entre e ciudadanonan ta biba un sensibilidad ecologico mas grandi. Ademas, mester agrega cu awendia e eficacia energetico por bira miho y na mes momento progresa den e buscamento di energianan alternativo. Pero tambe ta necesario un redistribucion planea di e recursonan di energia, di manera cu e paisnan tambe por yega na nan. No por laga nan destino den mannan di e prome cu yega o ta depende di e logica di mas fuerte. Ta trata di problemanan cu ta yama atencion cu, pa enfrenta nan na un manera adecua, ta rekeri di parti di tur hende un pensamento responsabel di e consecuencianan cu lo afecta e generacionnan nobo, y prome cu tur cos e cantidad di hobennan cu ta biba den e pueblonan pober, kendenan ta «reclama pa tin parti activo den e construccion di un mundo mihor» [119].
50. E responsabilidad aki ta global, pasobra e no ta toca solamente e energia, sino henter e creacion, pa no laga e generacionnan nobo pober den nan recursonan. Ta un mester cu e hende ta goberna responsabelmente e naturalesa pa custodie, hacie productivo cu metodonan nobo y tecnologia avansa, di modo cu e por acapara y alimenta dignamente e poblacion cu ta habit'e. Den nos tera tin lugar pa tur hende: Riba dje tur famia humano mester haña e recursonan necesario pa biba dignamente, cu e ayudo di e naturalesa mes, bendicion di Dios pa su yiunan, cu e perserverancia di su propio trabou y di su propio inventividad. Pero nos mester considera un deber masha grave pa laga e tera pa e generacionnan nobo den un estado den cua nan por biba dignamente y sigui cultiv'e. Esaki ta encera e «compromiso di dicidi hunto despues di haña e caminda pa sigui na un modo responsabel, cu e obhetivo pa fortalece e aliansa entre e ser humano y medio ambiente cu mester ta refleho di e amor di creador di Dios, di unda nos a bini y na unda nos ta bai» [120]. Ta di desea cu e comunidad internacional y cada gobierno por contra aresta eficazmente e formanan di utilisa e ambiente cu ta malo pa nan. Y tambe e autoridadnan competente mester haci e esfuersonan necesario pa e costonan economico y social cu ta sali di e uso di e recursonan ambiental comun por ser reconoci na un manera transparente y na gastonan cubri totalmente dor di esnan cu ta sali beneficia, y no dor di otronan o dor di futuro generacionnan. E proteccion di e ambiente, di e recursonan y di e clima ta rekeri cu tur esnan responsabel internacionalmente ta actua hunto y ta demostra ligeresa pa obra di buena fe, respetando e lei y e solidaridad cu e regionnan mas debil di e planeta [121]. Un di e mayor tarea di e economia ta precisamente e uso mas eficaz di e recursonan, no e abuso, teniendo semper presente cu e concepto di eficiencia no ta neutral pa loke cu ta trata balornan moral.
51. E forma cu hende ta trata e ambiente ta influencia den e manera con e ta trata su mes y viceversa. Esaki ta exigi cu e sociedad actual mester revisa seriamente su estilo di bida, den hopi parti di mundo, nan ta len pa hedonismo (haci di e placer un obligacion di e bida) y pa e consumismo (nan busca beneficio pa satisface nan necesidadnan), sin preocupa cu e dañonan cu por resulta di esaki [122]. Ta necesario un cambio efectivo di mentalidad cu ta haci nos adopta estilonan nobo di bida, «na forma di esnan den e buskeda di e berdad, e beyesa y e bondad, manera e comunion cu e demas hendenan pa un crecimento comun cu ta determina e opcionnan di consumo, di sparmento y di e inversionnan» [123]. Cualke acto di corupcion di e solidaridad y di e civismo ta produci dañonan ambiental, p.e. manera e degradacion ambiental, na mes momento e ta provoca insatisfaccion entre e relacionnan social. E naturalesa, specialmente den nos epoca, ta asina bon integra den e dinamica social y cultural cu practicamente ya no ta forma un variabel independiente. E destruccion y e empobrecimento di algun area di agricultura tambe ta resultado di e habitantenan y di nan baymento atras. Ora cu ta promove e desaroyo economico y cultural di e poblacionnan aki, tambe nan ta cuida e naturalesa. Ademas, hopi recursonan natural ta keda ruina dor di e gueranan. E paz di e pueblonan y den e pueblonan ta permiti tambe un vanguardia grandi di e naturalesa. E hortamento di recursonan, specialmente e awa, por provoca conflictonan grandi entre e poblacionnan cu ta wordo afecta. Un acuerdo pacifico riba e uso di e recursonan por salvaguardia e naturalesa y, na mes momento, e bienestar di e sociedadnan interesa.
E Iglesia tin un responsabilidad referente na e creacion y e mester resona esaki den publico. Y, ora cu ta haci esaki, no solamente mester defende e tera, e awa y e aire como doñonan di e creacion cu ta pertenece na tur hende. E mester proteg'e prome cu tur cos tur hende contra e destruccion di nan mes. Ta necesario cu ta existi un especie di ecologia di e hende cu ta bon comprondi. Sigur, e degradacion di e naturalesa ta hopi uni cu e cultura cu ta modela e moda di biba di hende: ora cu ta respeta «ecologia humano» [124] den e sociedad, tambe e ecologia ambiental ta beneficia. Mescos cu e birtudnan humano ta interrelaciona, di modo cu e debilitamento di un ta pone e otro tambe den peliger, mescos tambe e sistema ecologico ta apoya den un proyecto cu ta encera tanto e bon bibamento social como e bon relacion cu e naturalesa.
Pa salbaguardia e naturlesa no ta basta pa interveni cu incentivonan o desincentivonan economico, y ni sikiera cu un instruccion adecua. Esaki ta instrumentonan importante, pero e problema decisivo ta e capacidad moral global di e sociedad. Si no respeta e derecho di bida y e morto natural, si ta haci e concepcion, e gestacion y e nacimento di hende algo artificial, si ta sacrifica embrionnan di hende pa e investigacion, e conciencia comun ta caba pa perde e concepto di e ecologia humano y cu esaki esun di e ecologia ambiental. Ta un contradiccion pa pidi e generacionnan nobo pa respeta e ambiente natural, ora cu e educacion y e leinan no ta yuda nan pa respeta nan mes. E buki di e naturalesa ta uno cu no por parti, tanto den loke cu ta trata e bida, e sexualidad, e matrimonio, e famia, e relacionnan social, den un palabra, e desaroyo humano completo. E debernan cu nos tin cu e ambiente ta relaciona cu loke cu e persona ta considera den su mes y den su relacion cu otronan. No por exigi un y daña pa otro. E ta un contradiccion di e mentalidad y di e custumber actual, cu ta daña e persona, trasforma e ambiente y daña e sociedad.
52. E berdad, y e amor cu ta sali for dje, no por ser produci, solamente por ricibie. Su ultimo fuente no ta, ni por ta, e hende, sino Dios, o Esun cu ta e Berdad y Amor. E principio aki ta masha importante pa e sociedad y pa e desaroyo, p'esei cu ni e Berdad ni e Amor por ta solamente productonan humano; e vocacion mes pa e desaroyo di e personanan y di e pueblonan no ta fundamenta den un simpel deliberacion humano, sino cu e ta scirbi den un plan cu tawata prome cu nos y cu pa nos tur ta un deber cu mester wordo acepta libremente. Loke cu ta prome cu nos y cu ta traha nos- e Amor y e Berdad cu ta peranece- ta indica nos cu e ta bon y di kico nos felicidad ta consisti.
Asina e ta señala nos e caminda pa e berdadero desaroyo. pa bay siguiente >>